ÊRÎŞA LI SER BALAFIRGEHA SILÊMANÎ
AGAHIYÊN 8'Ê MEHÊ:

- Berpirsê Ragihandina HSD'ê Şamî: Heta selametî çêbû dûre me agahî dan 

Berpirsê Navenda Ragihandinê ya Hêzên Sûriya Demokratîk (QSD) Ferhad Şamî li ser malpera wan ev agahî dan: “Di çarçoveya berpirsyariyên ewlehiyê yên asta jor de û girêdayî selameta Fermandariya hêzên me, Navenda Ragihandina HSD'ê agahiyên der barê êrîşa Tirkiye ya li ser balafirgeha Silêmaniyê ku dema Fermandarê Giştî yê HSD Mezlûm Ebdî li wir bû pêk hat sînordar kir. Heta ku Fermandarê Giştî bi awayekî ewle gihîşt heremên Bakur û Rojhilatê Sûriyeyê. Di êrîşê de tu ziyanên canî çênebû. Der barê hurguliyên êrîşê de dê hêzên me di dema pêş de daxuyaniyeke berfireh belav bike.”

*

- Serokomarê Iraqê li ser êrîşa ser balafirgehê daxuyanî da 

Serokomarê Iraqê Latif Reşîd li ser êrîşa li ser Balafirgeha Navdewmetî ya Silêmanî daxuyanî belav kir û bang li Tirkiyeyê kir ku lêborînê bixwaze.

* 

- Ebdî li ser êrîşa li ser Balafirgeha Silêmanî daxuyanî belav kir

Fermandarê giştî yê Hêzên Sûriya Demokratîk (HSD) Mazlûm Ebdî li ser êrîşa hewayî ya li ser Balafirgeha Navdewletî ya Silêmanî peyamek belav kir. Ebdî li ser hesabê xwe yê twitterê wisa got: "Em êrîşa ji aliyê Tirkiyeyê ve ya li dijî balafirgeha Silêmaniyê şermezar dikin. Ev binpêkirin li Iraq û Sûriyeyê dewam dikin û bandorên wê yên xeternak li ser herêmê hene.”

Ebdî li ser têkiliya wan ligel YNK'ê re jî got: “Em têkiliyên xwe yên destpêkê yên bi bira û hevkarên xwe yên li Silêmaniyê re dewam bikin. Em di eniyekê de li dijî van binpêkirinan in."

*

- Rêveberiya Xweser êrîş şermezar kir

Rêveberiya Xweser a Bakur û Rojhilatê Sûriyeyê bi daxuyaniyekê êrîşa li ser balafirgehê şermezar kir û got ku divê helwestên zelal ên hemû hêzên Iraqê û başûrê Kurdistanê yên li hemberî vê êrîşê hebin.

* * * * 

7'ê mehe hat gotin ku êrîşek li hemberî Balafirgeha Silêmanî çêbûye. Paşê tiştên din hatin gotin. Me hemû agahî dan hev. Fermo em ji serî dest pê bikin:

- 3'ê vê mehê Tirkiyeyê seferên ji bo bajarê Silêmanî dan rawestandin. Di serî de ji Almanya seferên ji Ewropayê bi ser Stenbola Tirkiyeyê diçûn Silêmanî jî hatin rawestandin.

'ÊRÎŞA HEWAYÎ'

- 7'ê mehê hat gotin ku êrîşeke hewayî li hemberî Balafirgeha Silêmanî çêbûye. Asayîşa Silêmanî jî qala teqînek kir.

- Îdîa ew bû ku dronên Tirkiyeyê yên bê mirov êrîş çêkirine, lê ev yek zelal nebû.

RAYERADARÊ BALAFIRGEHÊ AXIVÎ

- Ji Navenda Ragihandin û Pêwendiyan yê Balefirgeha Navneteweyî ya Silêmaniyê Dana Mihemed gotiye, "Em red dikin ku êrîşek bi dronê çêbûye. Balefirgeha Silêmaniyê nehatiye bombebarankirin, tu teqînek çênebûye.

- Berdevkê Parastina Şaristaniya Silêmaniyê ragihandiye ku li nêzîkî balafirgehê agir bi pûş û giyayên hişk ên derdora çemek ketiye, lê ji bilî vê li herêmê û li balefirgehê tu bûyerek din çênebûye.

GELO MAZLÛM EBDÎ LI WIR BÛ?

- Hin çapemenî ragihandin ku êrîş li hemberî konvoya Serfermandarê Giştî yê Hêzên Sûriyeya Demokratîk (HSD) Mazlum Ebdî hatiye kirin.

- Rojnameya The Wall Street Journal li ser vê nûçeyek belav kir. Nûçe bi sernavê 'Li Iraqê bi dronê êrîşe rêberê kurd ê ji Sûriyeyê ku mutefîkê DYA'yê ye kirine' weşand. Di nûçeyê de tê gotin ku leşkerên DYA'yê jî di konvoyê de hebûn, lê kes birîndar nebûye. 

HSD: EV NÛÇE NE RAST IN

- HSD'ê li ser bûyerê daxuyanî da, "Hemû nûçeyên ku îdîa dikin ku Fermanadarê Giştî yê hêzên me Mazlûm Ebdî li bajarê Silêmaniyê hatiye armancgirtin ne rast in. Fermanadarê Giştî li ser erka xwe ye. Ew nûçeyên derew bi armanca şantajên siyasî li hember hinek hêzên başûrê Kurdistanê tên kirin."

TEVGERA AZADÎ BÛYER ŞERMEZAR KIR

- Tevgera Azadî ya Civaka Kurdistanê li ser êrîşê daxuyanî belav kir, ev yek wekî karekî dijminane bi nav kir û got: “Siyaseta girêdayî dagirkeran jî wekî siyaseta talanker a neftê mehkûmê têkçûnê ye. Daxwazê ji gel û hêzên siyasî jî dikin ji bo têkçûna xeyalên dagirkeran û nokeran têbikoşin.”

WEHAB HELEBÇEYÎ AXIVÎ

- Berpirsê Giştî yê Hêza Dijeterorê Wehab Helebçeyî wisa gotiye: “Êrîşa Silêmaniyê ji ber helwesta wê ya netewî ye, tiştek ku em vêşerin nîn e, lê madalyaya rûmetê ye û emê li xwe bikin. Wekî ku Serok Mam Celal digot, alîkariya parçeyên din yên Kurdistanê sûcdariyeke ku em red nakin û ji bo me rûmetek e.”

BAFIL TALABANÎ AXIVÎ

- Serokê YNK’ê Bafil Talebanî di derbarê êrîşa ser Balefirgeha Silêmaniyê de daxuyaniyek belav kir: “Em êrîşa li ser Balafirgeha Navdewletî ya Silêmaniyê û hewldana sterîl ên xizmetkarên biyaniyan ku armanc têkbirina ewlehiya sînorê Silêmaniyê ye, bi tundî şermezar dikin.”

BERDEVKÊ HIKUMETÊ KURDISTANÊ ADIL AXIVÎ

- Berdevkê Hikûmeta Herêma Kurdistana Federe Cotyar Adil daxuyaniyeke wisa da: “Em xemgîniya xwe ji bo êrîşa li ser Balafirgeha Navneteweyî ya Silêmaniyê nîşan didin. Ev rewşa metirsîdar di encama dagirkirina sazî û dezgehên hikumetê de û bikaranîna ji bo karên ne yasayî derketiye.”

QUBAD TALABANÎ BERSIVA ADIL DA

- Cîgirê Serokê Hikûmeta Herêma Kurdistanê Qubad Talabanî bi tundî êrîşa li ser balafirgehê şermezar kir û got: “Hedef girtina balafirgehek sivîl ne tenê binpêkirina serweriya Iraqê ye, bilindbûnek metirsîdar e li ser jiyana welatiyên kurd. Cotyar Adil ne berdevkê hikûmeta Herêma Kurdistanê ye, tenê di hikûmetê de nûneriya hizbekê dike. Ji ber wê nikare li ser navê hemû hikûmetê gotinan bike û em daxuyaniya wî şermezar dikîn.”

SEROKA PARLEMENA KURDISTANÊ AXIVÎ

- Seroka Parlamentoya Herêma Kurdistanê Dr. Rêwaz Fayeq wisa got: “Wekî çawa hemû êrîşên ji beriya niha li ser Balafirgeha Hewlêrê hatin kirin ne rewa bûn, tu hincetek ji bo êrîşa ne rewa ya ser Balafirgeha sivîl ya Silêmaniyê jî nîn e. Hikûmet mecbûr e li hemû bajarên Herêma Kurdistanê bi heman pîvanan tevbigere. Vê êrîşê û her kesê ku vê êrîşê rewa dibîne, şermezar dikîn.”

***

(Roja 7'ê mehê ev nûçe hate amadekirin û di amadekirina vê nûçeyê de me ji ajansên Rojnews, ANHA, Rûdaw, WSJ'ê sûde wergirtiye.
8'ê mehê agahiyên ku hatin me lê zêde kirin û her ku tiştên nû bên emê lê zêde bikin)