KOBANÎ
Şandeya Zanîngeha Rojava û ya Kobanê duh peymana dostaniyê û biratiyê bi Beşa Sosyolojiyê ya Zanîngeha Emden/Leer a almanî re heta 5 salan nû kir. Li ser vê yekê Dîcle Heyder ku endama şandeyê ye agahî da.

Heyder ku di heman demê de endama Fakulteya Jinelojiyê ya Zanîngeha Kobaniyê ye li ser mijarê got: “Gotin ew destpêkê di wê baweriyê de bûn ku têkilî piştî bidawîbûna dema peymana yekemîn, dê bi dawî bibe. Lê niha bi nûkirina wê re kêfxweş in. Her wiha ji me re destnîşan kirin ku wan sûd ji vê tecrubeyê, parvekirina agahiyan û semîneran girtiye.”

Piştî nûkirinê, şandeyê diyariyek da Beşa Sosyolojiyê ya Zanîngeha Emden/Leer û wan jî diyarî li endamên şandeyê belav kirin.

Şandeya zanîngehan tev li konferansekê bûn ku li zanîngehê têkildarî pergala perwerdeyê ya li ser wekheviya her du zayendan, demokrasiyê û parastina hawîrdorê hatibû lidarxistin.

Şande 18'ê Sibatê/Reşemiyê gihîştibû Almanyayê û di çend rojên dawîn de serdana Zanîngeha Bremenê, Zanîngeha Alice Salomon û Zanîngeha Leonburgê kiribû. Bi rayedar, mamoste û xwendekarên zanîngehan re civiya û pergala zanîngehên Rojava nîqaş kirin û Fakultaya Jinelojiyê bi wan da nasîn. Her wiha bi çalakvanên jin re civiyan û gelek mijarên girêdayî têkoşîna jinan nîqaş kirin.

Zanîngehan yekem car di sala 2018'an de peyman îmze kiribû. Ev peyman, têkiliyên di navbera beşên her du zanîngehan de bi rêxistin dike û li gorî wê semînerên hevbeş bi rêya înternetê û lêkolînên hevbeş têne parvekirin