Diyarname
Weşanxaneya Ronahî yek jê yê Heciyê Cindî yek jî yê Tolstoy du pirtûkên zarokan weşand.
Weşanxaneya Ronahî ku navenda wê li Amedê ye vê hefteyê du pirtûkên nû pêşkeşî zarokên kurd kir. Pirtûka yekemîn pirtûka nivîskar Heciyê Cindî ya bi navê “Hikyatên Cime’ta Kurda” ye. Ya duyem jî pirtûka Tolstoy ya bi navê “Çîvanok”e.
Pirtûka Heciyê Cindî wekî yekemîn çîroka zarokan a kurdan e ku hatiye nivîsîn tê hesibandin. Pirtûk, di sala 1935’an de yekem car bi tîpên kirîlî hat weşandin. Heciyê Cindî ku di nav xebata xwe de gelek lêkolîn jî kiriye, wan deman gund bi gund li Kurdistana Sor geriyaye û ev çîrok ji zarbêjan wergirtiye.
Çîrokên di pirtûkên de ji bo gelek kesî dê nas jî bên, ji ber ku hin versiyonên wan li van deran jî ji aliyê kal û pîran ve hatine gotin. Di pirtûkê de gelek peyvên ku winda bûne, yan jî li ber windabûnê ne jî hene ku ev yek ji bo ziman xebateke din a baş e.
Pirtûka duyemîn ku ji Ronahî derketiye "Çîvanok"a Tolstoy e û ji zimanê rûsî ji aliyê Tosinê Reşîd ve hatiye wergerandin. Hemû çîrok ên Tolstoy bixwe ne. Tolstoy di gundê xwe de ji bo ku zarokên derdora wî fêrî xwendinê bibin ev çîrok nivîsandine û bi wan daye xwendin. Wî di heman demê de ji bo wan mamostetî kiriye bi van pirtûkan. Ev pirtûk bi şêwazeke dîdaktîk hatiye nivîsîn. Tosinê Reşîd ev pirtûk wergerandiye û xistiye nava pirtûkxaneya kurdî.
Çîvanok / Tolstoy / Werger: Tosinê Reşîd / Çîrokên ji bo zarokan
Hîkyatên Cime'ta Kurdan / Heciyê Cindî / Çîrokên ji bo zarokan