Diyarname
Derhênerê yewnanî Theo Angelopoulos ku li nav sînemaya dinyayê xwedî ciheke taybet e di qezayeke de jiyana xwe ji dest da. Angelopoulos ku trajediya yewnana kişandibû sînemayê, venêrîn û kûrahiyeke mezin li sînemayê zêde kiribû.

Derhênerê navdar ê yewnan Theo Angelopoulos heta niha fîlmên wekî
"Zorba", "Rêwîtiya Ber bi Kîtarayê ve", "Dîmena Bimij", "Gava Leglegê ya Derengmayî", “Kumpanya', “Nêrîna Ûlîs", "Bêdawîbûn û Rojek", “Eleni/Çiyayê Digirî" û "Toza Zemanê" kişandibû. Hema hema hemû fîlmên wî di nav sînemaya dinyayê de bûne klasîk. Ji Zorba bigire heta Nêrîna Ûlîs, heta "Gava Leglegê ya Derengmayî" hemûyan jî bala hemû sînemaya dinyayê, bala sînemahezan, bala rexnegirîn sînemayê kişandibû.

Angelopoulos di sala 1935'an de li Atînayê hatiye dinê. Wî li Fransayê dibistana sînemayê xwendiye û paşê dest bi kişandina fîlman kiriye. Ew yek ji nûnerên sînemaya polîtîk e. Angelopoulos di nav teknîka sînemayê de nêrîneke taybet ji xwe re saz kir û fîlmên xwe li ser vê yekê saz kir.
Di fîlmên wî de hewaya bi mij, kesek tenê, xaniyên kavilbûyî, şerê ku bandor li mirovan bi taybetî li jinan kiriye, zarok, koçber û mirovan ji ser kokên xwe hatine qewirandin hene. Di fîlmê "Nêrîna Ûlîs" de Ûlîsê ku li bobînên windabûyî digere lê pêre jî dibe şahidê guherîna serdemekê; di fîlmê "Gava Leglegê ya Derengmayî" de jî balê dikişîne ser penaberan ku di nav wan de kurd jî hene. Di dawiya fîlm de pevçûn di navbera kurd û tirkan de dertê û dengê şînê bilind dibe.
Wî fîlmên xwe li ser trajediya yewnanan, trajediya Balkanan kişand. Angelopoulos kesek çepgir bû, heta dawiya emrê xwe jî wisa bû lê di heman demê de berê rexneyên tûj jî dida çepgiriyê.

Angelopoulos êvara 24'ê vê mehê diçû herêma Drapetsona ku li wê derê kişandina fîlmê wî "Behrek Din" dom dikir lê bisqisêlek lê qelibî û bi giranî birîndar bû. Ew bi ambûlansê rakirin Nexweşxaneya Metropolitan lê nekarî wî vegerînin jiyanê.

Angelopoulos ku sosyalîst bû wisa gotibû: "Em nifeşeke ku me hêvî dikir emê dinyayê biguherînin lê me neguhart. Dinya zêdetir ber bi başiyê ve neçû."

Derhênerê navdar wisa qala destpêka sînemageriya xwe kiribû di hevpeyvînekê de: "Ji bo min sînema di destpêkê de kabûsekê bû. Di salên 1946-47'an de min yekem car dest bi sînemayê kir. Hema piştî şer... Di 9 saliya xwe de fîlmek ku min lê temaşe kir bandor li jiyana min kir. Di fîlm de gangsterekî ber bi sendeliya elekrîkî ve dibirin. Gangsterê ku ji tu tiştî neditirsiya dem çêdibû ditirsiya. Di salên piştî vê demê de ev sehne her diket xewna min û gotina ganster ku digot 'ez naxwazim bimrim' ji min re dibû wekî kabûsek. Yekemîn fîlmê min li ser dîktatoriya albayan bû. Li ser hin rastiyên wê demê min kir ku tiştek derxim holê. Di fîlmên min de rêwîtî, sirgûn mijarên min bûn. Van di hemû jiyana min de dest ji min bernedan, hê jî bernadin."

Derhênerê gorbihuşt Angelopoulos di Festivala Fîlman a Cannesê jî têde li gelek festîvalan gelek xelat girtibû. Festîvala Fîlman a Navneteweyî ya Stenbolê jî bi "Xelata Serketina di Hemû Jiyanê de" (2000) ew xelat kiribû.