AMED
6 partiyên siyasî yên kurdan ji bo zagoneke bingehîna a nû ya demokratik bê avakirin li ser "Pêşnûmeya Zagona Bingehîn" pêşniyarên xwe bi civîneke eşkere kirin. Partiyên kurdan di pêşnûmeyê de xwestin nasnameya gelê kurd bê naskirin, partî û rêxistinên kurdan bi navê kurd û Kurdistanê bê mîsogerkirin, zimanê kurdî bi awayekî fermî bê qebûlkirin, li erdnigariya Kurdistanê gelê herêmê xwe bi xwe bi rê ve bibe.

Nûnerên Partiyên kurdan BDP, HAK-PAR, KADEP, OSP, KCD û TEVKURD û TDŞK, li Salona Resepsiyonê ya Parka Sumerê ya Amedê di civîna çapemeniyê de pêşniyarên xwe eşkere kirin. Di civînê de Hevserokê Giştî yê BDP'ê Selahattin Demîrtaş li ser navê partiyan pêşnûme xwend. Demîrtaş, got ku pêkanîn û geşedanên siyasî yên rojane zêde rojevê tije dikin û wiha got: "Ji bo pirsgirêkên Tirkiyeyê çareser bibin divê berî her tiştî zagoneke bingehîn a demokratîk bê avakirin. Em jî wekî partiyên kurdan ji bo zagoneke bingehîn a demokratîk ji bo pêşniyarên xwe ji bo raya giştî parve bikin me pêşnûma amade kir.

'Kesên bedel nedan nema'

Demîrtaş, got ku zagona bingehîn a heyî mafê her kesî naparêze û ji bilî neteweya tirk her kesî li derve dihêle. Demîrtaş, wiha axivî: "Her tişt li gorî "Neteweya tirk" hatiye avakirin. Her tim zagonên bingehîn bi rêyên dijdemokratîk û fermana leşkeriyê hatin amadekirin. Her tim ji aliyê hêzên serdest ve zagonên bingehîn hatine avakirin. Lê divê mafê her kesî û rengê her kesî bê parastin. Em wekî partiyên kurdan ji bo mafê kurdan û hemû gelan bê parastin kom bûn û me pêşnûmayek hevbeş amade kir. Em wekî gelê kurd ê demokratîk û muxalif ji bo mafê xwe yê aştî, azadî, ziman, nasname û çandê bi dest bixin van daxwazan dikin:

* Divê ziman û nasnameya kurd bê parastin û bê naskirin.

* Divê mafê rêxistinî yê kurdan li gorî pîvanên gerdûnî bê parastin. Divê kurd karibin bi navê kurd û Kurdistanê xwe bi rêxistin bikin û komeleyên xwe ava bikin. Divê ev nav bê mîsogerkirin.

* Divê kurdî bibe zimanê fermî û kurd zimanê zikmakî di her qada jiyanê de serbest bikar bînin.

* Divê gelê kurd li ser erdnîgariya Kurdistanê karibin xwe bi xwe bi rêve bibin.