Amed
Wezareta Karên Hundir a Tirkiyeyê der heqê şaredar, endamên meclisa şaredariyan û bajêr ku li Amedê di salên 2009 û 2010’an de hatin girtin, biryara ‘jidûrxistina peywirê ya demkî’ da.

Li Amedê di salên 2009 û 2010’an de siyasetmedarên kurd şaredar, endamên meclisên şaredariyan û endamên meclisên bajêr bi sedan kes hatin girtin.

Wezareta Karên Hundir  niha der barê wan de biryara ‘jidûrxistina ji peywirê ya demkî’ da.

Wezareta hikûmeta AKP’ê ragihand ku dawî li erkên siyasetmedarên kurd ên hilbijartî aniye ku di nav wan de Serokê Meclisa Giştî ya Bajarê Amedê Şehmûs Bayhan, Şaredarê Kayapinara Amedê Zulkuf Karatekîn û cîgirê wî Sebahattîn Dînç, endamê Meclisa Şaredariya Mezin a Amedê û Wekîlê Şaredarê Amedê Alî Şîmşek, endamên Meclisa Şaredariya Baglarê Husamettîn Çîçek û Haci Erdemîr jî hene.

Di nivîsa ku wezaretê şandiye de tê gotin ku bi pesendkirina wezaretê ‘wekî bergiriyek demkî’ dawî li erkên siyasetmedarên kurd aniye.