Diyarname

Kovara sê mehane ya bi kurdî û erebî Şermola ku li Rojava derdikeve hejmara xwe ya nû, hejmara 14’an derxist. Kovarê di vê hejmarê de dosyaya "Êzîdî û Êzîdiyatî" amade kiriye.

Kovara çandî wêjeyî û hunerî Şermola hejmara xwe ya bihara 2022’yan derxist. Kovarê di vê hejmarê de li ser "Êzîdî û Êzîdiyatî" dosya amade kiriye û agahiyên di vê mijarê de pêşkêş kirine.

Di vê hejmarê de jî ji bilî dosyayê mijarên wekî analîzên hizrî, lêkolîn, hevpeyivîn, nirxandina pirtûkan, werger, jin û çand, huner, çîrok, helbest, gotar û raporên wêjeyî cih girtine.

Edîtorî bi ser navê  “Êzîdî û Êzîdiyatî.. oleke yekxwedayî û pêkhateyeke resen e” nivîs belav kiriye û wekî din Menan bi nivîsa “Êzîdiyatî”, Beşîrê Mele Newaf bi “Ol û Wêje”,  Fawaz Ayo bi “Êzîdiyên Sûriyeyê û Guhertinên Siyasî” di dosyayê de cih girtiye. Li aliyê di bi sernavê “Qewlê Çarşemê” jî nivîseke din di dosyayê de hatiye weşandin ku  Şemo Qasim Dinanî ew kom kiriye.

Li aliyê din Şerîf Mihemed li ser  “Sê Gundên Êzîdiyan li Cizîrê (Otelce,  Ala Reş,  Şekeriyê) nivîsa xwe pêşkêş kiriye. Di hevpeyvînên vê hejmarê de Aram Hesen ligel nivîskar Silêman Cafer axiviye.

Di vê hejmarê de nivîsên Abdullah Ocelan, Diyar Bohtî, Berzo Mehmûd, Şînda Ekrem, Hêvîdar Xalid, Roza Metîna hatine weşandin.

Salihê Heydo, Merwan Berekat, Abbas Abbas, Vejîna Kurd û Mufîde Koto bi çîrokên xwe, Ednan Dogan, Karîna Osêyan, Ednan Îbrahîm, Rûken Hisên, Ofê Reşîd û  Aras Qasim jî bi helbestên xwe ked dane kovarê.