Cemil OGUZ

Vê mehê em berê xwe bidin çîrokeke cihêreng, çîroka antrenorekî, antrenorekî kurd ku çîroka wî li Licê dest pê kiriye, li Stenbolê didome û wê hê bidome. Em qala antrenorê fûtbolê Celal Erkan dikin.

LI KOÇERAN HAT DINÊ

Di sala 1975'an, sala ku erdhejê Licê hejandibû Celal Erkan li gundê Koçeran a Licê hat dinê. Ew dibistana seretayî li wir dixwîne, lê wekî bi hezaran zarokên kurd derfet tunebûye ku xwendina xwe bidomîne. Loma jî piştî salan dema berê xwe dide metropolan ji derve dibistana navîn û lîseyê dixwîne û temam dike. Bi vê jî nasekine, dikeve zanîngehê, li Zanîngeha Anadoluyê Beşa Têkiliyên Bi Gel re dixwîne, dûre dîsa li Zanîngeha Anadoluyê Beşa Rêveberiya Sporê dixwîne û temam dike. Û ew wekî zanîngeha sêyemîn niha dîsa li heman zanîngehê beşa Emlak û Rêveberiya Emlakê dixwîne.

LI GUND FÛTBOL

Celal Erkan heta 14 saliya xwe li gund dimîne. Ji zarokatî de ji fûtbolê hez dike. Li gund ligel hevalên xwe her dilîze, lê dema hinek din mezin dibe vê carê ligel tîma gund bi gundên din re dilîze. Yekem "maçên deplasmanê" jî li wir dest pê dikin. Her hefte ew diçin gundên din, gundên derdorê, gundên derdorê jî tên gundên wan û bi hev re fûtbolê dilîzin.

SERPÊHATIYA KAYSERIYÊ

Dema dîroka xwe li salên 90'î diqelibîne li nav hemû kurdan, li Licê jî ser û binobûneke dest pê dike. Her ciwan berê xwe didin cihekî, ji bo para Celal Erkan jî koçberî dest pê dike. Ew ligel hin xizmên xwe diçin Kayseriyê. Li wir ew di înşaatan de dixebite, lê dest ji fûtbolê jî bernade. Di wê demê de "neqandina lîstikvanên ciwan" li dar dikeve. Ji ber vê eleqeya Celal Erkan a ji bo fûtbolê, wî jî dişînin nav van neqandinan. Diçin Kuluba Esentepeya Kayseriyê. Gogê dilîzin û di encamê de ji nav ew qas ciwanan wî û yekî ji Yozgatê hildibijêrin. Celal Erkan 4 salan li Esenteqe Sporê wekî amator dilîze. Paşê diçe tîmek mezintir, diçe Kayseri Buyukşehir Belediye Sporê. Piştî kurtedemekê vê carê tîma jêrîn a Beşîktaşê gazî wî dike û pêvajoya Stenbolê bo wî dest pê dike.

EDÎ LÎSTIKVANÊ BEŞÎKTAŞ'Ê YE

Celal Erkan hê ciwan e, divê bikemile ku ji xwe tîmên mezin ên Tirkiyeyê wisa dikin. Ji bo vê yekê kulub wî dişîne tîma xwe ya pîlot Beşîktaş Yildiz Sporê. Ew 4-5 salan li vir dilîze, kaptaniya tîmê dike û dema sal tê 99'an ku ew êdî bi her awayî dikare di tîmeke profesyonel de bilîze, ji Diyarbakir Sporê gazî wî dikin.

'LI DIYARBEKIR SPORÊ PÊŞÎ LI MIN GIRTIN'

Em dixwazin ew bixwe qala pêvajoya Diyarbakir Sporê bike. Dibêje: "Sala 99 yan destpêka 2000'î bû. Coşkun Demirbakan û Mujdat Yetkiner ji bo hevdîtinê me şandin Diyarbekir Sporê. Em du kes çûn. Serokê Kulubê Adnan Okturen bû. Wan Hikmet Çapan girtin, gelek pere jî dan wî. Ji min re gotin 'Tu zaroyê Diyarbekirî, fedekarî bike'. Ji çaran yekê pereyê ku dabûn Hikmet Çapan pêşniyarê min kirin, ev bêedaletî bû, min qebûl nekir. Li wir Adnan Okturen pêşî li min girt. Ji ber wî ez derbasî tîmeke profesyonel nebûm. Ez vegeriyam Stenbolê. Ez gelek aciz bûbûm. Gelek tîmên din ên profesyonel gazî min kirin, lê min lîstina fûtbolê êdî di serê xwe de xilas kiribû. Ez neçûm cihek din û min dev jê berda."

DEBAR Û KAR

Piştî ku êdî dest ji fûtbolê ber dide dest bi kar dikeve. Li Saziyên Murat Egîtîmê dest bi kar dike. Pêşî broşurên wan belav dike, paşê şêwirmendiya saziyê dike, di salên dawî de jî dibe şirîkê şaxek ji wan. 10 salan zêdetir di vê saziyê de kedê dide.

ANTRENORÎ DEST PÊ DIKE

Di vê navberê de wî dest ji lîstinê ber daye lê meyla wî ya li ser fûtbolê xilas nebûye. Dinêre ku xilasî tune, dibêje "Ez bibim antrenor". Em niha guh didin wî: "Sala 2005'an bû. Ez çûm min serî li TFF'ê (Federasyona Fûtbolê ya Tirkiyeyê) da. Pêşî ez çûm Kursa C. Ez jîr bûm. Heman salê min Lîsansa C girt û bi vê lînsansê di salên 2005-06, 2006-07'an de li Klûba Dîkîlîtaş Sporê ya Beşîktaşê ez bûm cîgirê Teknîk Dîrektor Yaşar İçli. Ji wê salê wêdetir her çi semîner hebûn min serî lê didan û ez diçûm. Heta niha min gelek sertîfîka girtin."

Salên dûre ji bo antrenorî zêdetir rê li ber vedibe. Di sala 2015-16 ji qursa "TFF û Halk Egîtîm"ê sertîfîkaya rêveberina zarokên  6-13 salî digire. Li aliyek karê antrenorî, li aliyê din xebata li Murat Egîtîmê. Dema di sala 2015'an de, ew yek ji avakar û şirîkê Murat Egîtîm a Umraniyeyê ye, ji Şîle Sporê gazî wî dikin. Ew wê salê Tîma A ya Şîle Sporê bi rê vedibe. Dûre li dor 5-6 mehna li Yildiz Sporê antrenorî dike.

ŞAMPIYONIYA LIGEL CIWANAN, ‘MOURINHO CELAL’

Celal Erkan kar û antrenorî bi hev re dimeşîne. Di sala 2016-17'an de wekî antrenor U12 ya Çekmekoy Alemdag Sporê bi rê ve dibe, bêyî carek jî têk biçe tîm dibe şampiyon. Sala bê vê carê U14 ya heman tîmê teslîmê wî dikin, lîgê duyemîn temam dike. Her ku diçe tîmek bilindtir didinê: Di 2017-18'an de U15'ê teslîmê wî dikin. Bêyî ku di maçek de jî têk biçe lîgê demam dike lê nikare tîmê derxe lîgek jortir ji ber ku reqîbê wî ji wan zêdetir gol avêtibûn, ew dibin şampiyon. Di sala  2018-19'an de jî vê carê U16 teslîmê wî dikin. Heman salê U15 jî bi rê ve dibe, ji ber ku antrenor dikarin di salek de du koman bi rê ve bibin. Ji wan U16'ê dike şampiyon. Ciwanên U16 gelek ji wî hez dikin. Û di pîrozbahiya şampiyoniyê de wekî "Mourinho Celal" tezahurat dikin.

PANDEMÎ BANDORÊ LÊ DIKE

Di sala 2019'an de diçe Kursa B ya UEFA'yê. Beşa yekem li Rîvaya Stenbolê temam dike, beşa duyem dê serê 2020'an de li dar bikeve û lîsanlê bigire lê pêvajo pandemiyê dest pê dike, ev pêvajo hinek dirêj dikişîne. Dîsa jî ew di sala 2020'an de Lîsansa B digire. Bi vê lîsansê dike bi awayekî profesyonel tîmek bi rê ve bibe. Di heman demê de diçe kursa "Sertîfîkaya Analîz û Performansê" û digire. Bi vê yekê dikare di Lîga Super de jî wekî analîzkarekî kar bike.

MESELEYA FAIR PLAY

Antrenor Celal Erkan îsal tîma  U18 ya Şaredariya Çekmekoy Alemdag a Stenbolê bi rê ve dibe. Maçên îsal meha borî dest pê kirin û di 4 hefteyan de 3 serketin, yek jî wekhevî bi dest xistiye. Xala ku bû meseleya fair play û çepik ji bo Erkan hatin lêdan jî vê demê çêbû: Di maça Çekmekoy BLD. Alemdag û Kartal Elçî (20.11.2021), di deqîqeya 60'î de lîstikvanê Kartal Elçîsporê seqet bû û ji sehayê derket. Ji ber ku yêdekê tîmê tune bû man 10 kes. Li ser vê yekê antrenorê Çekmekoy Bld Alemdagê Celal Erkan forvetê xwe Yigit Bora ji lîstikê derdixe. Em ji antrenor Erkan guhdarî dikin: "Tîma hember 10 kes mabûn. Ne tiştek adil bû ku em 11 kes bilîzin. Min lîstikvanê xwe derxist û min got em 10-10 bilîzin. Li ser navê fair playê min wisa kir. Gere wisa be." Tîma Celal Erkan di maçê de 8-0 bi ser dike û ji ber vê tevgera wî jî ji aliyê derdora sporê ve hat pîrozkirin.

LÎSTIKVAN ŞANDIN FB û GS'yê

Di van demên ku ew antrenorî dike her lîstikvanên ciwan ên serketî ji bo tîmên mezin pêşniyar dike. Di van 3 salên dawî de ji lîstikvanên wî yek çû Galatasaray, didu çûn Fenerbahçe, yek jî çû Başakşehîrê. Ew lîstikvan niha di tîmên jêrîn ên van tîmên mezin de dilîzin û Erkan dibêje, "Armanc ew e van zarokan diyar bikim, pêş bixim û diyarî fûtbola profesyonel bikim."

HEDEFÊN WÎ

Celal Erkan niha xwe amade dike ji bo Lîsansa A ya UEFA'yê serî lê bide û dibêje, "Di nav du salan de ezê Lîsansa A bigirim." 

Û wekî dawî jî van lê zêde dike: "Hedefa min profesyonelî ye. Piştî ez Lîsansa A bigirim ez dixwazin ji bo bajarê xwe, ji bo fûtbolê xizmeteke baş bikim. Li bajarê min pêşî li min girtin, nehiştin ez fûtbolê di tîmên profesyonel de bilîzim, niha ez dixwazim tîmên profesyonel bi rê ve bibim. Belkî rojekî bi vî awayî tîma Amedê jî bi rê ve bibim. Ez ji fûtbolê hez dikim. Diwazim bi fûtbolê ciwanan ji tiştên xirab dûr bigirim û wan bixim nava sporê, nava fûtbolê."

Antrenor Celal Erkan niha Tîma U18 ya Çekmekoy BLD Alemdag Sporê bi rê ve dibe.