Zinarê XAMO

Kurdekî bi navê Kadîr Amaç ji xwediyê Weşanxana Avesta Abdullah Keskîn re bi uslûbeke gelkî ne xweş û cilq gotiye:

"Tu ji tirkan fêrî xapandinê bûyî. Ez baş zanim tu ji her nivîskarêdixwaze kitêba xwe biweşîne di nabêna 2 hezar û 3 hezar euro pere distînî."

Wele 2-3 hezar euro perakî pir e, diyar e di nava me de nivîskarên zengîn jî hene. Xwezî Kadîr Amaç hema navek bigota. Lê tenê îtham kiriye û ew jî bi zimanekî gelkî cilq kiriye.

Min bersîva Abdullah Keskîn* nedîtiye, lê belê gelek nivîskarên Avestayê kitêbên wan weşandine bersîva Kadîr Amaç dane, gotine tiştê tu dibêjî ne rast e, buhtan e, Avestayê ji me tu pere mere negirtiye.

Ji ber ku Avestayê tu kitêbên min neweşandiye, lema jî ez nikanim tiştekî bibêjim. Lê gelek nivîskaran gotine ev îdîaya Kadîr Amaç ne rast e, vir e.

Feqet bi bawerîya min heger Avestayê ji hin nivîskaran pere girtibe jî ne qebhet e, bazareke di nabêna nivîskar û weşanxanê de ye. Heger nayê hesabê nivîskar bira qebûl neke…

Weşanxaneyek kane ya ji ber ku kitêbek ne hêjayî weşanê ye ya ji ber ku ji nivîskarê kitêbê heza nake, ya jî ji ber sebebekî din neweşîne. Lê xwediyê kitêbê kane bi pereyê xwe kitêba xwe bide weşandin.

Min "Antolojiya Çîrokên Zarokan” ji Avestayê re, ji Periyê re, ji Nûbiharê re şand, lê neweşandin. Dûre Rûpelê weşand, niha jî min da Weşanxaneya DARA.

Ne hemû, lê gelek weşanxaneyên kurdî îdeolojîk in, ji bo ku kitêba te biweşîne ya divê tu dostê xwediyê weşanxaneyê bî, ya jî torpîla te hebe.

Yanî kalîteya kitêbê bi xwe têra weşanê nake. Mesela ”Antolojiya Çîrokên Zarokan” kitêbeke pir baş e, lê Avestayê jî, Nûbiharê jî û Perîyê jî neweşand.

Ne ku kitêb ne hêjayî weşanê ye. Bi texmîna min ji ber ku kêfa wan ji min re nayê, ji min hez nakin lema neweşandin. Belkî sebebekî din hebe.

Lê heger texmîna min rast be jî ez tu carî xwe ji xwediyên Avestayê û Nûbiharê aciz nakim. Ew ne mecbûr in ji min hez bikin, ne mecbûr in kitêba min biweşînin. Kêfa wan ji min re nayê û kitêba min baş be jî naweşînin.

Merivê kêfa meriv jê re neyê, meriv kitêba wî neweşîne normal e. Ez normal dibînim û xwe naxeyidînim.

Kitêba min ”Stirîyên me” jî kesî neweşand. Min ji Nûbiharê û ji APECê re şand, di medya sosyal de ez li weşanxaneyeke geriyam, kesî neweşand. Ji ber ku nivîskar Zinarê Xamo ye lema mişteriyên wê çênebûn.

Dawiya dawî min bi pereyê xwe da çapkirin û belaş belav kir.

Yanî Avestayê ji hin nivîskaran, ji bo hin kitêban pere girtibe jî ne sûc e, ne jî qebhet e, nexwestiye kitêbê biweşîne, nivîskar bi perê xwe kitêba xwe daye çapkirin.

Ji Bloga wî Hindik-Rindik hatiye girtin

*Têbiniya Diyarnameyê: Piştî Zinarê Xamo ser twitterê lînka nivîsê belav, Abdullah Keskin binî de nivîsiye ku wan heta niha ji tu kesî ji bo çapkirina pirtûkê pere negirtiye.