Diyarname

Kovara çand, huner û polîtîkayê Dilop bi hejmara xwe ya nû li pêşberî xwendevanên xwe ye. Kovarê di hejmara xwe ya 21'ê, meha gelawêj û rezberê de li ser Qedrî Can dosya amade kiriye.

Dilopê dosyaya li ser Qedrî Can wisa daye nasîn; "Qedrî Canê komunîst û welatperwer jî di temamê heyata xwe de rewşenbîrekî gelê xwe ye ku bi vê ezmûnê hatiye ceribandin. Bi heyata xwe ya ku di 1911an de li Dêrîkê dest pê kiriye û di havîna 1972an de li Şamê, li mişextiyê bi dawî bûye, bûye yek ji nûnerên zeraqdar ên mirovahiya bipêşketî. Him bênasnamebûnê ji xwe re kiriye derd, him jî enternasyonalîzmeke bêçîn û bêyî kedxwariyê weke doz neqandiye; bi helbest, çîrok, werger û nivîsên xwe bûye nemir."

Rêdûr Dîjle, Ayhan Erkmen, Îsmaîl Dîndar û Enwer Karahan bi nivîsên xwe ked dane dosyayê. Her wiha Reşo Ronahî ligel Prof. Merîwan Umer Dewlet li ser Qedrî Can hevpeyvînek kiriye. Dewlet dibêje, "Qedrî Can stêrkeke torevaniya modern e."

Prof. Merîwan Umer Dewlet dibêje. "Divê bê zanîn ku malbata Bedirxanan çi kiribe ji bo kurd û kurdayetiyê, Qedrî Can jî wê kiriye, ji wan kêmtir nekiriye. Heta mala Barzanî jî bixwe deyndarên Qedrî Can in." Li ser çimaya vê yekê jî van lê zêde dike: "Ji ber ku helbestên xwe yên herî ciwan ên modern pêşkêşî

Mele Mistefa kiriye. Barzanî kiriye qehremanek  bi helbesta xwe ya Serdarê Kurd Barzanî. Bi qewla Dr. Îzeddîn ve jî –ku ew aşiqê vê helbestê bû- heya wê demê helbesteke wiha bi muzîk nehatibû nivîsandin. Forma vê helbestê jî formeke pirr nû ye, pirr modern e. Loma dubare dibêjim malbata Barzanî deyndarê Qedrî Can in. Heta niha ji bo wî tiştek nekirine. Lazim e wefayek nîşan bidin ji bo dilsozî û xebatên wî."

Ji nivîsên din, Mesut Alp bi sernavê "Hahooo, qiloçên Îskender hene!" nivîsîke gelek balkêş nivîsiye. Îbrahîm Karaca jî bi navê "Bizim Gasparyan" (Gasparyanê Me) li ser hunermendê ku demek berê mir nivîsa xwe pêşkêş kiriye.

Îbrahîm Karaca, Cuma Pîa, Recep Maraşli, Bernas Qerejdaxî, Mehmet Bayrak, Ercument Akdeniz, Ali Yavuz, Veysi Ulgun, Dr. Omer Uluçay, Can Deniz Eraldemir, Mela Mihyedîn, Kemal Înal, Meftun Atakan, Namik Kuyumcu bi nivîsên xwe, Mem Al û Welat Esen jî bi helbestên xwe ked dane kovarê.

Ji bo tekilî û xwestinê:

Telefon: 0543 488 69 96

E-mail: dilopdergisi@gmail.com

Malper: kovaradilop.net