Rêveberiya Xweser a Bakur û Rojhilatê Sûriyê bersiva wezîrê karên derve yê Rûsyayê da û careke din piştrast kir ku ku pabendî diyalog û çareseriya nîştimanî ya sûrî ne, her wiha rola Rûsyayê bi erênî nirxand ku navbeynkariyê bike.

Daîreya Têkiliyên Derve ya Rêveberiya Xweser a Bakur û Rojhilatê Sûriyê got: "Rêveberiya Xweser a Bakur û Rojhilatê Sûriyê ji destpêkê ve piştrast dike ku aloziya Sûriyê tenê bi rêya diyaloga sûrî-sûrî çareser dibe."

Rêveberiya Xweser di daxuyaniya xwe de ku îro daye, wiha domand: “Di vê çarçoveyê de Rêveberiya Xweser kar û xebatan dimeşîne da ku bigihêje vê armancê û diyalogê bi hikumeta Şamê re pêk bîne. Lê pirsgirêka sereke ew e ku hikumeta Şamê guhertinê qebûl nake û bi zîhniyeta xwe ve girêdayî ye ku di encamê de vê aloziyê rû da. Ji ber wê hikumeta Şamê bi awayekî cidî diyalogê nake, ne tenê bi Rêveberiya Xweser re, lê belê bi aliyên din ên Sûriyê re jî.”

Her wiha Daîreyê bal kişand ser navbeynkariya Rûsyayê ya di diyalogê de û got: “Birêz Sergey Lavrov duh behsa diyaloga bi hikumeta Şamê re kir û em vê yekê wek gaveke erênî ber bi pêkhatina çareseriyê ve dibînin.”

Daîreya Têkiliyên Derve ya Rêveberiya Xweser di daxuyaniya xwe de hêvî kir ku Rûsya roleke erênî di vê diyalogê de bilîze û wiha dewam kir: “Em ji bo diyaloga nîştimanî amade ne û ji bo wê gelek civîn bi hikumeta Şamê re li dar ketin. Rûsya dizane ku sedema binketina wan civînan hikumeta Şamê ye, ji ber ku bi israr e ku rewşa Sûriyê vegerîna mîna beriya 2011`an.”

Daîreyê destnîşan kir ku kiryarên hikumeta Şamê ne li gorî xebatên diyalogê ne, bi taybet bûyerên kuştinê yên bê ser û ber û tevgerên provokatîf ên li Helebê û çargoşeyên ewlehiyê yên li herêma Cizîrê. Daîreyê da xuyakirin ku ji vir diyar dibe ku hikumeta Şamê der barê çareseriyê de ne cidî ye.

Daîreya Têkiliyên Derve ya Rêveberiya Xweser di dawiya daxuyaniyê de ev yek piştrast kir: “Em ê pabendî diyalog û çareseriya nîştimanî bin. Ew rêgezeke stratejîk e. Em rola Rûsyayê bi erênî dinirxînin ku navbeynkariyê bike û di vê çarçoveyê de encamên pratîk pêk bîne. Wek Rêveberiya Xweser em amade ne diyalogê bi hikumeta Şamê re bikin, lê bi şertê ku taybetmendiya herêmên me û fedakariyên ku di têkoşîna li dijî terorê û ji bo parastina Sûriyê û yekitiya wê de dane, li ber çavan bê girtin.”

ANHA