Diyarname
Di maça duyemîn a Kûpaya Super a Spanyayê de Barselonayê bi 3-2 Real Madrid têk bir û kûpa bir mala xwe.

Di maça yekem a li Barnebauyê de Real Madrid û Barselona bi 2-2 wekhev mabûn. Rovanşa maçê li Nou Campê li dar ket. Real Madridî bi lez dest bi maçê kir, dest bi êrîşan kir lê di deqîqeya 15'an de li ser navê Barselonayê Iniesta bersiv da û gola xwe avêt: 1-0.
Real Madrid nesekinî. Di deqîqeya 20'î de bi Cristiano Ronaldo bersiv da û 1-1'î derket holê. Berî ku nîveka yekemîn bi dawî bibe Lionel Messi gotina xwe got: 2-1.
Nîveka yekemîn a maçê bi 2-1, bi serketina Barselonayê bi dawî bû.

Nîveka duyemîn jî bi coş dest pê kir. "El Clasico" careke din meziniya xwe ya li dinyayê nîşan dida. Êrîşên hemberî hev, berxwedanên dijî hev her dom dikirin lê di deqîqeya 81'ê de Karim Benzema li ser navê Real Madrîdê digot em hê hene: 2-2.

Bi vê bi encam biba dê kêliyên demdirêj ên maçê jî li dar biketa, lê Barselona û di serî de jî Messi ne qayil bûn. Careke din Messi, careke din gulê dilê fûtbolê, mezinê mezinan di deqîqeya 87'an de; kesî nedî, kesî nedizanî ji ku derê hat û lêda: 3-2.
Bi vê golê Barselonayê Kûpaya Sûper a Spanyayê bir mala xwe. Di vê sehayê de Pep Giardola li hemberî Jose Morinho qet têk neçûbû, careke din jî bi ser ket. Lê mesele ne tenê ev e, di maçê de hin rekor jî hatin şikandin.

Vane ew rekor:
- Barselonayê di sala 2009, 2010 û 2011'an de bû sê caran vê kûpayê ser hev de bi dest dixe. Heta niha tenê Real Madridê bi ser hev de 3 caran bi dest xistibû. Lê ne li hemberî Barselonayê.

- Yekemîn car di Kûpaya Sûper a Spanyayê de Barselonayê Real Madrid têk bir û kûpa bi dest xist.

- Messi di vê maçê de 2 gol avêt. Bi vê yekê rekora Raul ya di El Clasicoyan (Maçên Derbî yên di navbera Barselona û Real Madridê de) de şikand. Di El Clasicoyan de Raulê (lîstikvanê berê yê Real Madrid) 11 gol avêtibû û Messi îro bi avêtina 2 golan ev rekor şikand.

- Di vê maçê de 3 heb jî qertên sor hatin dayîn. Di deqîqeya dawî de lîstikvanê Real Madridê Marcelo faûlek dijwar kir û maç tevlihev bû. Lîstikvan ketin nav hev. Lîstikvane Real Madridê Mesut Ozil ku ji maçê derketibû jî êrîşê Barselonayiyan kir. Villa bersiv da. Di encamê de Marcelo, Ozil, Villa (her du jî ji maçê derketibûn) qertên sor dîtin.

- Di maçê de bi têra xwe qertên zer jî hatin nîşandayîn. Ji Barselonayê Xavi û Mascherano, ji Real Madridê jî Khedira, Ronaldo, Marcelo, Pepe, Ramos, Coentrano qertên zor dîtin.