Sêrt
Di panela ku bi sernavê "Bi hev re lêgerîna li pêşerojê" li Sêrtê hate li dar xistin de gotinên nivîskar û rojnameger Nuray Mert derketin pêş. Mert got: "Kurd di zagona bingehîn de statuya siyasî dixwazin." Perwerdekar Turgay Dabakoglu jî got ku ji ber mexdûriyetên ku Zagona Bingehîn a 1980'ê derxistine holê divê dewlet ji kurdan lêborînê bixwazin.

Panel ji aliyê Baroya Sêrtê ve li Salona Konferansê ya Zanîngeha Sêrtê li dar ket. Di panela ku roja 03.07.2011'an li dar ket de, Prof. Dr. Turgut Tarhanli, perwerdekar Turgay Dabakoglu, rojnameger û nivîskar Nuray Mert û Doç. Dr. Veysel Ayhan axivîn.

Serokên Baroyên Amed, Mûş, Şirnex, Bedlîs, Sêrt û Îzmîr jî di nav de gelek kes beşdar bûn.
Pêşî Tarhanli axivî û got ku digel ku 80 xalên Zagona Bingehîn a sala 1980'ê guherîne jî ev 30 sal in kes dest nedaye rihê bingehîn ê zagonê. Tarhanli got: Xalên destpêkê yên zagona nû divê bi awayê baweriyê bidin hemû civakê bêne amadekirin.

Mert jî got ku di pêvajoya 30 salan de tevgera siyasî ya kurdan zor daye projeya netewe dewletê û di zagona bingehîn a nû de kurd dê zorê li normên giştî yê azadiyê bikin. Mert got: "Aliyeke ku daxwazên siyasî yên kurdan temsîl dikin heye û divê em ji bîr nekin ku ev beşeke mezin a civakê temsîl dike. Xweseriya Demokratîk ku dibêjin ne tenê bi xurtkirina rêveberiyên herêmî ve girêdayî ye, di zagona bingehîn a nû de divê bê fêmkirin ku kurd statuyeke siyasî dixwazin."

Ji DÎHA'yê hatiye girtin