Diyarname
Festîvala Fîlman a Navneteweyî ya Stenbolê berî ku dest pê bike hin fîlman radigihîne xwendekarên dibistanan. Di vê çarçoveyê de li 14 zanîngehan û 3 jî lîseyan fîlm dê bê pere bêne nîşandayîn.
Festîvala Fîlman a Navneteweyî ya Stenbolê îsal 30’emîn sala xwe li dar dixe. Festîvala ku îsal di navbera 2-17’ê avrêlê de li dar dikeve, wekî salên borî îsal jî berî festîvalê çalakiya xwe ya bi navê “Em berî festîvalê li dibistananin” li dar dixe.
Fîlmê Todd Solondz “Savaş Sirasinda Yaşam /Jiyana di dema şer de” û fîlmê Noah Baumbach “Greenberg” li 14 zanîngeh û 3 lîseyan bê pere dê bê nîşandayîn.
Nîşandayîna fîlman 7’ê mehê dest pê kir û heta 30’ê mehê li zanîngehên wekî Bilgi, Bogaziçi, Galatasaray, İstanbul, İstanbul Teknik, Kadir Has, Mimar Sinan û Sabancı Üniversiteleri, her wiha li lîseyên wekî İstanbul Lisesi, Uskudar Amerikan Lisesi û Robert Kolejî bê pere têne nîşandayîn.
Di çarçoveya vê çalakiyê de Dîrektora Festîvalê Azize Tan jî 10’ê mehê roja pêncşemê wê li Mithat Alam Film Merkezi ya Zanîngeha Bogazîçî amade be û bi temaşevanan re sohbet bike. Ev çalakî dê saet 16.00’an de li dar bikeve.