Diyarname

Wergêr Sayîme Xakpûr romana Helîm Yûsiv a bi navê "99 Morîkên Belavbûyî" wergerand farisî û roman ji Weşanên Afraz derket. Xakpûr dibêje "Min xwest hevwelatiyên min romana kurdî nas bikin."

Kurtedemek berê wergera romanê bi farisî ji Weşanxaneya Afrazê derket. Werger Sayîme Xakpûr ji bo Huner Online a Farisî axiviye û dibêje, "Bê guman wergerandina berhemên wêjeyî yên zimanekî li ser zimanê din, dikare di warê nasandina wî zimanî û wêjeya wî de gavên mezin bavêje. Min jî xwest hevwelatiyên min romana kurdî nas bikin, ji ber ku ev roman ji bilî asta xwe ya bilind a wêjeyî, dikare statuyeke baş ji civaka kurdan raberî gelê Îranê bike, da ku hinekî baştir hevnijadên xwe yên li welatên din nas bikin.

Xakpûr dibêje, bi taybetî "99 Morîkên Belavbûyî" hilbijartiye û wisa didomîne: "Ev berhem rastiyên Rojhilata Navîn û bi taybet kurdên Sûriyeyê ku bi neçarî tûşî şeran bûne û her wiha pirsgirêkên xelkê sivîl ên di nava wan şeran de vedibêje. Roman êş û elem û kambaxiyên ku carinan bi evînê re têkel bûne radixe ber çavan û rastiya hebûna mirovan li wî welatî bi awayekî realîstî raber dike. '99 Morîkên Belavbûyî' xwîner carinan li kolanên Ewropayê û carinan di nava kavilên şer de, carinan bihêvî û carinan bêhêvî ber bi encameke renge xembar ve dibe."

Xakpûrê da zanîn ku roman pêwendiyeke xurt bi xwînerên Rojhilata Navîn re çêdike û wiha domand: "Nivîskar wate û têgeha 'welat' a ku li cem xelkê Rojhilata Navîn heye, bi awayekî herî baş di naveroka romanê de tîne ziman û dijwarî û zoriyên jiyanê bi zimanekî zelal û wêjeyî vedibêje. Ya rast sedema sereke ya ji bo wergerandina vê romanê ev bû rastiyên jiyana gelê min bi awayekî herî baş tê de hatine teswîrkirin."

Wergêr Xakpûr diyar dike ku ev roman jiyan û çarenivîsa kesekî bi navê Azad vedibêje ku li Almanyayê penaber bûye. Tizbiyeke wî heye ku keçeke bi navê Bêrîvan berî ku Azad ji Sûriyeyê derkeve, wekî diyarî daye wî û wiha didomîne, "Çîroka jiyana Azad û çarenivîsa wî di nava wan morîkan de veşartî ye û her libeke tizbiyê beşek ji jiyana wî ya pevgirêdayî nîşan dide. Ev berhem rewşa dijwar a jiyana penaberên ku ji welatên xwe koç dikin radixîne ber çavan. Bê guman em ê di pêşerojê de navê Helîm Yûsiv li rex romannivîsên navdar ên cîhanê bibînin. Romannivîsê ku ji nava dilê vî gelî derketiye û dikare gelên cîhanê ber bi dîtina şerên malkambax ên biyaniyan kirine vê herêmê, ve bibe."

Romana Helîm Yûsiv "99 morîkên belavbûyî" di sala 2015'an de ji aliyê  Weşanên Peywend ve hatibû weşandin. Romanê ku ji 150 rûpelan pêk tê, di sala 2018'an de çapa wê ya duyemîn hatibû kirin.