Diyarname

Roja 1'ê Avrêlê/Nîsanê Roja Henekan a Dinyayê bû. Me jî wekî her sal nûçeyek henekî weşand. Sernav ev bû: "Barzanî: Me biryar da em derbasî alfabeya latînî dibin" weşand. Nûçe wisa belav bû, Diyarnameyê di dîroka xwe de tiştek wisa nedîtiye. 

Nûçe saet 10'ê serê sibê di Diyarnameyê de hat weşandin û pêre me li ser hesabê twittera Diyarnameyê belav kir. Saet tam 12'yê şevê (yanî di 14 saetan de) ew twitt ji aliyê 75 hezar kesî ve hatibû dîtin. Dîsa heman saetê me mêze kir 4177 kes ketine Diyarnameyê û ew nûçe xwendine.

Nûçe li ser twitterê gelek hat RT kirin, ji aliyê deh hezaran ve hat ecibandin.

Nîqaşên balkêş derketin. 

Li gor baweriya me encama nûçeyê ev bû:

- Nûçe li ser twitterê ji aliyê 75 hezar kesî ve hatiye dîtin lê 4 hezar û 177 kes jêvegeriyaye malperê û ew xwendiye. Diyar e ku yên twittirê bikar tînin kêm dixwînin. Hema yan RT, yan diecibînin û derbas dibin. Ev ne tiştek xweş e.

- Mirov dikare bibêje sedî 10 meraq dikin ka di hundirê nûçeyê de çi ye?

- Hinan raste rast Hikumeta Herêma Kurdistanê pîroz kirin bêyî binêrin ka çiqas rast e, hinan got dereng jî mane, hinan mijarên din anîn holê, kêm be jî hin dij derketin ku çima alfabeyê diguherînin.

- Bi vê nûçeyê re derket holê ku piraniya kesên nûçe dîtine (ez dikarim bi giştî bêjim sedî 90) daxwaz dikin ku yek alfabeya kurdan hebe û ew jî latînî be.

- Malperek kurdan ev kir nûçe, piştî çend saetan nûçe ji malperê rakir.

- Yên bi çavên xweşik li nûçeyê nêrîn jî hebûn. Hinên ku çêr kirin jî hebûn.

- Ligel ku twittek bi kurdî ye, nûçe bi kurdî gelekên bi zimanên tirkî şirove nivîsandin jî derketin. Çima, em nizanin?

- Kêm be jî bi îngilîzî û fransizî jî şirove hatin nivîsandin.

- Ligel ku piştî nûçeyê me agahiya "Agahî: Li ser heneka îro" weşand jî hê pirsên "Ev nûçe rast e?" yan jî "Yên digotin pîroz be" dom dikirin.

Û hin şiroveyên ku hatine kirin em dixwazin li vir carek din parve bikin (Me dest nedaye nivîsan):

- Ulaş Korkut: 

Min di nûçeyê de paragrafa dawî nexwend, hûn jî nexwînin bila dilê we xweş bimînî.

Ez hêvî dikim di demek kurt de, desthildarên başûrê vê biryarê bi cîh bînin. Bo vê Nûçeyê gelek kêfxweş bûm.

- Iqlim Mîlanî: 

Ez dîyarnameyê pîroz dikim gelek kesan troll kirin û devê sindoqa niqaşa bê encam ê salan jî dîsa vekirin

- Ekrem Malbat: 

Ev henek nîşanê me da ku ji %90ê kurdan nivîsan heta dawî naxwîni

Gernas Nenas:

Heyf yaw, Kurd ji henekan fam nakin û karê wan çêr û dijûn e. Li binê vê henekê tiştên ecêb tên gotin.

- Navgiran: Birêz  @masrour_barzani bi hêvîyên me dileyizin. Gelo alfabeya latînî dê kengî li dibistanên başûrê Kurdistanê were bikaranîn?

- Xelîlbeg:

Diyarnamecîm, di demên dawîn de ez heb bi vî rengî nehatîbûm xaqandin. Çi kêfa min xweş bibû ji bo nûçeyê malmîrat

- Xwenas: 

Bi henekîya wê em ewqasî kelicîn. Ku rast be dê çi bibe. Em ê ji kêfa bifirin.

- Keşa: 

Xwezka ev xeber rast bûya me yê pehînek dî li ereban û li alfabeya wa ya tahl xistiba

- Berevaji: 

Ti xerabî di vir de tune ye. Meseleyan zêde mezin nekin. Te nedîtibe jî gelek malper û rojname henekan dikin di yekê nîsanê de. Jixwe ne nûçeyeke heqaretî an rûreşî bû. Hêviyeke hin mirovan bi awayekî îronîk dide nîşan. Hinekî bitehemul bin.

- Ronî Bedirxan: 

Ez hînî henekên we yên yekê nîsanê bûme :) Par li ser mijara yekîtîya kurdan we henekek kiribû, gava min xwend çavên min bel bûbûn ji kêfan. Lê vê carê berîya ez lînkê vekim min fehm kir ku henek e, hûn nikarin êdî bi hestên min bileyizin :))

Û bi destûra we gotina edîtorê me yê din Zekî Ozmen jî em biweşînin: "Edîtorê @diyarname1 hêja @oguzcemil1 pîroz dikim ku karî kêliyekî vîrûsa corona ji rojeva gelek kesan derîne :)

Îhtîmal e gelek şiroveyên din ên xweşik jî hebin, biborin me nekarîn hemûyan bidin.

Bi xêr û gunehên xwe carek din Roja Henekan a Cîhanê me li dû xwe hişt. Bi hêviya ku rojek dê kurd bikaribin çîrokên xwe tenê bi yek alfabeyê lêbikin.

***
Têbinî: Ji ber piştî 24 saetan hê jî nûçe dihat RT kirin, ecibandin, me twittek wisa weşand:

HENEK!

Hêjano, duh ev nûçeya ku me weşand HENEK bû, ne nûçeyek rast e...

24 saet ser re derbas bûye hê peyamên pîrozbahiyê tên. Heta niha 94 hezar kesî ev nûçe dîtiye. Sipas bo we hemûyan. Bi hêviya kurd dê bikaribin rojek YEK alfabeyê bikar bînin.  (Roja 02.04.2020'an ev têbinî lê hatiye zêdekirin)

**

Vaye ew nûçe:
- Barzanî: Me biryar da em derbasî alfabeya latînî dibin