Enqere
DTP'ê pêşniyaznameyeke zagonî da meclisê û xwest: "30 hezar navên gund û bajaran kirine tirkî, kurdiya wan bê bikaranîn."

Heta niha dewletê li dor 30 hezar navên gund, navçe û bajarên kurdan ku bi kurdî bûn guhartin kirin tirkî. Niha ji bo ku ev navê kurdî tevî tirkiya wan bê bikarnanîn mebûsê DTP'ê yê Şirnexê Hasip Kaplan daxwaznameyeke zagonî da mecsilê.
Li ser mijarê Kaplan digel mebûsê DTP'ê yê Mûşê Sirri Sakik li meclisê daxuyaniyeke da çapemeniyê.
Kaplan da zanîn ku cihên wekî Mezopotamya, Trakya û Anatolî ku Komar li ser hatiye avakirin ji bo gelek şaristaniyan mazûvanî kiriye, ev der xwediyê dewlemendiyeke mezin e û wiha dom kir: "Lê 30 hezar û 280 cihên ku navên van deran bi kurdî, gurcî, tatarî, çerkeçî, lazî, erebî an jî bi zimanên din bûn hatine guhartin."
Kaplan got ku ji van 12 hezar heb navên gundan bûn ku hatine guhartin û yekem car jî di sala 1925'an de li Artvînê navên bi gurcîtî hatine guhartin, di sala 1940'î de bi Giştînameya Wezareta Hundir a bi hejmara 8589 hatiye guhartin lê ji ber Şerê Cîhanê yê 2'yemîn ev zêde nehatiye cih.

Hasip Kaplan got ku di sala 1949'an de bi Zagona Îdareya Bajarên a bi hejmara 5442'yan ev guhartin kirine fermî, di sala 1957'an de "Lijneya Îhtîsaskirina Guherîna Navan" hatine avakirin heta 1978'an li ser 75 hezar navên deran lêkolîn kirine û ji van 30 hezar zêdetir guhartine. Dîsa di sala 1981'ê de navê 280 gundî guhartine. Kaplan wiha got: "Di vê guhartinê de navên hin gundan wisa xirab in ku rûmeta mirov têk dibin. Minak li navçeya Hezexa Şirnexê navê undê Kivax ku yêzîdî lê diman kirine 'Mexare', gundê ku navê wê 'Harapşeref' bû kirine 'Dirsekli', 'Herpist' kirine 'Yarbaşi'. Di sala 1937'an de navçeya ku navê wê 'Hezex' bû jî kirine Îdil'."

Mebûsê DTP'ê Kaplan xwest Benda D ya Xala 2'yan a Zagona bi hejmara 5442'yan bê guhartin û navên kevn tevî yên nû bêne bikaranîn.

Berê mebûsa DTP'ê ya Şirnexê Sevahir Bayindir li ser navên cihan û polîtîkayên asîmîlasyonê pêşniyaznameyeke dabû meclisê, lê Serokê Meclisê bi îdîaya 'Li dijî Neteweperweriya Ataturk e' pêşniyazname red kiribû.