AMED
Hevserokên BDP'ê Selahattîn Demîrtaş û Gultan Kişanak, nerazîbûn nîşanê hewldanên ji bo girtina Roj TV dan û diyar kirin ku, bi boneya ku binpêkirinên mafan yên li Tirkiyeyê û polîtîkayên hikumetê deşîfre dike, tê xwestin ku Roj TV bê girtin. Hevserokan ji bo Roj TV'yê re banga piştgiriyê kir û got: "Girtina DTP'ê çi be, ya Roj TV'yê jî ew e"

Nerazîbûnên li hemberî doza girtina Roj TV'yê berdewam in. Hevserokên BDP'ê Selahattîn Demîrtaş û Gulten Kişanak dan zanîn ku girtina Roj TV dikin mijara bazarê. Gulten Kişanak, diyar kir ku ev 8 sal in hikumet ji bo girtina Roj TV di nava hewldanên dîplomatîk de ye û wiha berdewam kir: "Hikumetê di hilbijartina sekretariya giştî ya NATO'yê ya Rasmussen de qrîz derxisti bû. Li hemberî girtina Roj TV'yê hikumetê piştgirî da Rasmussen. Di vê dema ku nîqaşên çareseriyê tên kirin de dîsa ji bo girtina Roj TV pêkutî tên zêdekirin. Ev jî dide nîşandayîn ku Hikumeta AKP'ê li ser plana tasfiyekirinê dixebite."
Kişanak di berdewama axaftina xwe de anî ziman ku Roj TV dengê gelê kurd e û da zanîn ku hêza tu kesî têrê qutkirina dengê gel nake. Kişanak, di serî de ji Hikûmeta Danîmarkayê re û ji hemû dewletên Ewropayê yên din re bang kir ku dest ji vê xeletiyê berdin.

Selahattîn Demîrtaş, jî nerazîbûn nîşanê helwestê da û destnîşan kir ku Komara Tirkiyeyê ji bo tasfiyekirina saziyên ku ji bo azadiya kurdan polîtîka dimeşînin, her tim xebat dikin. Demîrtaş, got ku ev polîtîka di roja me de jî ne guheriye û da zanîn ku polîtîkayên hemû van pêvajoyan ji bo tasfiyekirina kurdan tên meşandin.
Demîrtaş, got ku heta zihniyeta îdeolojiya fermî neguhere li Tirkiyeyê tu tişt naguhere û anî ziman ku helwesta ku li hemberî Roj TV'yê tê meşandin jî vê yekê dide nîşandan.

Hevserokê BDP'ê Demîrtaş got ku Roj TV deng, guh û çavê gelê kurd e û ji ber vê rastî pêkutiyan tê. Demîrtaş, der birî ku ji ber binpêkirina mafê mirovan yên li Tirkiyeyê û polîtîkayên AKP'ê deşîfre dike, tê xwestin Roj TV bê girtin. Demîrtaş, ev tişt li axaftina xwe zêde kir: "Dewlet jî girîngiya Roj TV'yê baş dizane. Ji ber wê jî ji Danîmarka, Almanya û Firansayê re hin mercên Tirkiyeyê pêşkeş dike. Dewlet polîtîkaya xwe ya "Bila Roj TV bê girtin, çi tawîz lazim bin em dê bidin" birdozî dimeşîne. Roj TV di sirgûniyê de weşanê dike, bila navenda xwe bîne Amedê û di nava standardên navneteweyî de weşana xwe bi avayekî azad li Amedê bi meşîne.

Demîrtaş, di dawiya axaftina xwe de ji bo Roj TV banga piştgiriyê kir û wiha dawî li gotinên xwe anî: "Divê her kes xwedî li deng û regê xwe derkeve. Girtina DTP'ê çi be, ya Roj TV yê jî heman tişt e. Em bi rêyên dîplomatîk ji bo ku Roj TV neyê girtin, di nava hewldanan de ne. Çi ji destê me bê em dê bikin."