Diyarname
Li Amedê bi beşdariya dora 300 kesî vê serê sibê Komxebata Tora Ziman û Çandan dest pê kir.
Tora Ziman û Çandan ev demek e xebateke berfireh daye ber xwe. Di vê çarçoveyê de li Amedê du rojan bi navê Komxebata Tora Ziman û Çandan daye dest pê kirin. Komxebatê vê sibê li Demîr Otelê dest pê kir û sibê dê bi dawî bibe. Axaftina destpêkirina komxebatê ji aliyê zimanzan Zana Farqînî ve hat kirin. Farqînî bal kişand ser polîtîkayên asîmîlasyonê yên li ser kurdî. Farqînî wisa got: "Li ser ziman û çandê gelek saziyên ji hev cuda xebatan dimeşînin. Lê me dît ku ev yek têrê nake û pêdiviya bi hev re xebatê derket holê. Ji avakirina Komarê re heta îro ziman û çanda kurdî bi polîtîkaya asîmîlasyonê re rû bi rû ye. Piştî vê sedsala çûyî re niha yekem car me sînyalên tunebûna kurdî dîtin. Emê nîqaş bikin ku em cawa dijî vê derkevin, li hemberî êrîşên li ser ziman û çanda me emê rêbazek çawa bimeşînin, emê van tiştan nîqaş bikin."
Farqînî got ku ji bo kombexat baş bimeşe wan 12 kom ava kirine, di van koman de nivîskar, weşanger, kesên bi ziman û çandê re eleqedar, karsaz, endamên odeyên pîşeyê, saziyên mafên mirovan, akademîsyen, civaknas, saziyên jin û zarokan dê hebin û ewê nîqaş bikin.
Piştî axaftina destpêkê komxebat ji bo çapemenî hat girtin û wan di nav xwe de dest bi axaftin û nîqaşan kir.
Bernameya Komxebatê bi vî rengî ye:
ROJA YEKEM:
09:30 – Axaftina destpêkê
10:00 – 13:00
Komxebatên Tematîk: Weşangerî, Nivîskar, Çand , Huner, Ziman û Perwerdehî, Odeyên Pîşeyî, Saziyên Hiqûq û Mafan, Karsaz, Ragihandin, Akademîs û Sosyo-lîngûîstîk, Sazîyên Jinan , Xebatên Zarokan
13:00 – 14:00 Navbera Xwarinê
14:00 – 15:00 Hazirkirina raporan
15:00 – 15:15 Navber
15:15 – 18:00 Xwendin û nirxandina encamên komxebatan
ROJA DUYEM:
10:00 - 11:00 Nîqaşkirin û dîyarkirina nexşerê
12:30 – 13:30 Navbera Xwarinê
13:30 - 16:30 Rêzikname û statûya Torê
Foto: MA