Diyarname

Albuma nû ya Sîmir Rûdan derket. Stranbêjê ciwan ê ku bi muzîka xwe ya hemdemî tê naskirin, bi albuma xwe ya bi navê “Kevî” rêya xwe ya hunerî didomîne. Di albûmê de 10 stranên bi şêwazên rock, reggae, akustîk û şêwazên alternatîfî hene. 

Sîmir Rûdan hemû zîrekiya xwe kiriye di nava vê berhema xwe de. Ew bi xwe xwediyê gotin û awazên stranên di berhemê de ye. Her wiha aranjeya albumê jî wî bi xwe kiriye. Di vê berhema nû de ne tenê kalîteya muzîkê, her wiha gotin jî gelekî balê dikişîn ser xwe. Gotinên felsefeyî ji hêla naverokê ve bi hosteyî hatine hûnandin. Her wiha kurmanciya gotinan a fesîh û pak jî taybetiyeke din a vê berhemê ye. Stranbêjê ciwan Sîmir Rûdan hem bûyer û hem jî serpêhatiyên xwe vehûnandine û kirine stran. Bi strana “Rojên” Reş behsa qedexe û rûdanên li Cizîrê dike. Bi Jirmam Leylê şîneke xwe tîne zimên. Ne tenê bûyer û serpêhatiyên wî, her wiha di stanên xwe de pirsgirêkên civakî jî kirine babeta stranan. Di strana “Ava Şêt Diherike” de pirsgirêka tiryakan û “Hêsirên Veşartî” de pirsgirêka newekheviyê tîne zimên. “Kevî” albûma duyemîn a Sîmir Rûdan e. 

Sîmir Rûdan kî ye?

Sîmir Rûdan ji Cizîrê ye. Sala 1999'an ji bo xwendekariyê diçe Enqereyê. Bi destpêkirina zanîngehê re bi muzîkê re bêhtir eleqedar dibe. Xwe fêrî lêdana gîtarê dike û li hinek cihan derdikevê ser dikê. Di sala 2002'yan de di Koroya J. S. Bach de ku ev koro girêdayiyê Beşa Hunerên Xweşik a Zanîngeha Enqereyê bû, ji bo demekê stranbêjiya aryayan dike. Loma di muzîka Sîmir Rûdan de formên rojavayî yên mîna rockê û muzîka klasîk a rojavayî xuya dikin.

Di Sala 2005'an vedigere Cizîrê. Li vir serpêhatiya xwe ya muzîkê bêhtir ji aliyê afirandinê ve didomîne. Sala 2013'yan bi navê ‘Bi Çîrokî’ albuma xwe ya yekem derdixe. Sala 2015'an di albûma Peşkê de bi strana Berfîn cih digire ku di vê albumê de ji bo bîranîna helbestvan Bro Omerî gelek muzîkjen li hev civiya bûn. Ew ji sala 2015'an ve li Stenbolê dijî. Ji hêlekê ve li dibistanekê de şêwirmendiya derûniyê dike û ji hêla din ve bi kar û barên muzîkê ve mijûl dibe.

Yên bixwazin dikarin ji ser torên civakî re jî li stranên wî guhdarî bikin. Vaye stranek ji albumê "Li Aliyê Din":