Hevserokê BDP'ê Demirtaş di civîna Koma BDP'ê de ya li meclisê de axivî. Vane gotinên wî:

Girtîgeh
- Li girtîgehên Tirkiyeyê rewş gelek nebaş e. Pinpêkirin di asta herî jor de ne. Ji ber ku cih di girtîgehan de nemaye girtî li salon, korîdar û erdê radizên. Girtiyên nexweş nayên dermankirin. Her wiha girtiyên wekî Nûrettîn Soysal, Halît Guneş û gelek girtiyên din li ber mirinê ne. Hemû mafên girtiyan ê civakî, siyasî û nameyan tê astengkirin. Ligel rewşa girtiyan a nexweş, girtiyên rewşa wan giran serbest nayên berdan. Hikumet li şûna rewşa girtiyan baş bike û wan serbest berde ketine nava hewldanên avakirina girtîgehên nû. Li welatekî rewşa demokratikbûna wê girêdayî rewşa girtîgehan e. Rewşa girtîgehan eyneya demokratîkbûna wî welatî ye.

Zimanê zikmakî
- Li hemû welatên pêşketî perwerdehiya zimanê zikmakî tê dayîn. Tenê li Tirkiyeyê, bi tenê bi zimanekî perwerdehî tê dayîn û hemû zimanên din qedexe ne. Ev yek asta demokratîkbûna Tirkiyeyê nîşan dide. Serokwezîr Erdogan dibêje 'ji bo perwerdehiya ziman tiştekî ji min nexwazin' Raste em ji xwe tiştekî ji wî hêvî nakin ku em tiştekî ji wî bixwazin. Em dê bi gelê Tirkiyeyê re vê pirsgirêka perwerdehiyê çareser bikin. Em dê bi têkoşîna xwe ya demokratîk vî mafî bi dest bixin. Tu hêvî û bendewariyên me ji vê feraseta statukoparêz tune. Ev pirsgirêka gelê Tirkiyeyê ye.

Boykot
- BDP'ê li herêmê di biryara boykotê de piştgiriyek mezin girt. Gel, piştgiriya xwe ya boykotê û daxwaza makeqanûnek nû di sindoqan de da nîşan. Li bajarê herêmê gel helseta xwe ya li dijî hikûmetê û makeqanûna antîdemokratîk bi awayekî zelal da nîşan û diyar kir ku ew makeqanûnek ku mafê gelê kurd diparêze dixwaze. Bi vê helwesta gel rê li pêşiya niqaşên nû yên makeqanûna demokratîk hate vekirin. Gel diyar kir ku ev makeqanûn ne demokratîk e û mafê wan nayê parasitn."

Bendava hilbijartinê
- Di pêşiya me de hilbijartin heye. Tenê li Tirkiyeyê bendava hilbijaritnê heye. Ev bendav li dijî demokrasiyê ye. Ji ber bendava hilbijartinê heye vîna gel naveke meclisê. Divê hemû partiyên siyasî li hemberî vê bendava hilbijartinê derkevin. Bendava hilbijartinê ne tenê pirsgirêka partiya me tenê ye. Pirsgirêka hemû partiyên siyasî ye. Divê em vê yekê bi hev re çareser bikin.

Operasyonê li dijî BDP'ê
- Li aliyekî ji ber em siyasetê dikin cezayê pereyan li me dibirin. Li aliyê din li ser navê "Operasyona KCK'ê" bi ser malên rêveberên me û partiyên me de digirin. Hevelên me binçav dikin û digirin. Çend roj berê li Rihayê nêzî 30 hevalên me binçavkirin û ligel hevserokên Rêxistina me ya Rihayê 8 kes girtin. Ev girtin siyasî ye û dijhiqûqî ye. Li ser agahiyên derewîn û ne rast hatin girtin. Hincet jî meşê dide nîşandan. Meş mafekî herî demokratîk e. Ger ku ev yek sûc be em dê heta dawî vî sûcî bikim.

Bangek ji bo RTUK'ê
Di TRT û di hin televîzyonê alîgirê hikumetê de rêzefîlmên wekî "Sakarya Firat", "Olumsuz Kahramanlar", "Tek Turkiye", "Kurtlar Vadisi" hene, bi van ne mimkûn e çanda biratiyê pêş bikeve. RTUK divê li ser wan rola xwe bîne cih. Hemwelatiyên ku ji van aciz in jî divê gilî bikin. Yên ku ji ber stranên bi kurdî ceza li radyo û tv'yan dibirin van çima nabînin?

Zagona bingehîn a nû
Ji bo zagona bingehîn Erdogan tiştek dibêje, Kiliçdaroglu tiştek dibêje. Di vî warî de em wekî partî xebata xwe didomînin, ji aliyê din ji bo platforma zagona bingehîn a demokratîk û sivîl çêbibe emê amade ne ku piştgiriyê bidir. Ji bilî rêbazeke wisa zagoneke bingehîn a nû ji dêvla zagona leşkena wê bibe zagona kesên ji burokratiyê tên.