Diyarname

7'emîn Fûara Pirtûkan a Amedê ku ji aliyê TUYAP'ê ve tê organîzekirin dest pê kir.  Weşanênxaneyên kurdan jî têde li dor 130 weşanxane û saziyên sivîl beşdar dibin. Fûar heta 6'ê mehê her roj saet di navbera 10.00 - 19.30'yan de vekiriye, roja dawî saet 19'an de tê girtin.

Di fûarê de li dor 70 çalakî hene ku yek ji wan îro bi navê "Nêrîna Komarê ya li kurdan, nêrîna kurdan a li Komarê" bû ku lêkolîner Erdogan Aydin û Ayşe Hur beşdar bûn. 

Di panela ku Weşanên Lîteratur amade kir de Erdogan Aydin qala sed salên Komarê kir û got ku di kongreyên Erzerom, Sêwas û Amasyayê de welat wekî yên kurdan û tirkan hatiye binavkirin, lê paşê bi girtina klûbên kurdan ên li Amed, Wan û Sêrtê re pêvajo bi awayê xwînrijandinî hatiye bidawîkirin. Aydin got ku daxwaza mafên kurdan bi zordarî hatiye çewsandin, bi polîtîkaya asîmîlasyon û tunekirinê xwestine kurdan ji ser vê erdnîgariyê ji holê rakin.

Lêkolîner Ayşe Hur jî got ku neteweperestên tirk ji bo mezinên kurdan li cem Kemalîstan bigirin bi awayekî veşarî belgeyên sexte yên xweseriyê ji bo wan şandine. Hur got ku ji bo Simko û Mehmûd Berzencî jî name hatine şandin û ev yek lê zêde kir: Armanca Mustafa Kemal ew bû ku kurdan asîmîle bike û di nav neteweya tirk de bihelîne. Hur got ku kêmasiya herî mezin a kurdan ew bû ku bername û stratejiyeke aîdê wan ligel wan nîn bû.

'Çîroka kurdan a modern'

Di çalakiyek din de ku bi sernavê “Osman Sebrî û Avakirina Çîroka Kurdî ya Modern" li dar ket de nivîskar Sîdar Jîr û Dilawer Zeraq beşdar bûn. Di panela ku Weşanên Lîs li dar xist de nivîskaran li ser Osman Sebrî, kovara Hawarê û wê serdemê dîtinên xwe anîn ziman.

Ev nûçe li ser agahiyên ku ji MA'yê hatine girtin hatine sazkirin

 **

Nûçeya Eleqedar:

- Li Amedê çalakiyên bi kurdî û yên li ser kurdan

- Weşanxaneyên kurdan ên dê li Amedê bin diyar bûn

- Fûara Pirtûkan a Amedê xwe amade dike