Amed

Li ser nîqaşa di navbera Serokwezîr û Tanrikulu de, Serokê Baroya Amedê Sezgîn Tanrikulu got: Der barê perwerdehiya bi zimanê zikmakî û bikaranîna zimanê zikmakî ya di saziyên fermî de Serokwezîr xwedî agahiyên kêm e..

Dema heyeta Amedê çûbû serdana Serokwezîr Recep Tayyip Erdogan di navbera Serokê Baroya Amedê Sezgîn Tanrikulu û Serokwezîr Erdogan de nîqaş derketibû. Tanrikulu ji bo ku li ser vê nîqaşê agahî bide çapemeniyê li Navenda Perwerdehiyê ya Baroyê civînek çapemeniyê lidar xist. Tanrikulu, destnîşan kir ku bêsiûdiya ku di dema serdanê de hatiye jiyandin, bi daxuyaniya nivîskî ya ji aliyê Erdogan ve hatiye dayîn re, hîn xirabtir bûye û got: "Divê nîqaş baş bê diyarkirin. Ez ji salên lîseyê û vir ve di mijarê perwerdehiya bi zimanê zikmakî de xwedî helwestekê me û wekî Erdogan dibêje ev yek 'propaganda' an jî 'serwîsa ji hinek cihan re' ye."

Sezgîn Tanrikulu da zanîn ku tiştên bi serokwezîr re nîqaş kirine mijara perwerdehiya û zimanê kurdan e û wiha dom kir: "Der barê perwerdehiya bi zimanê zikmakî, perwerdehiya di zimanê zikmakî de û bikaranîna zimanê zikmakî ya di saziyên fermî de Serokwezîr xwedî agahiyên kêm e. Li gor Buroya Navenda Îstatîstîkan a Swêdê di sala 2006'an de hejmara zarokên kurd ku li Swêdê dersa bi kurdî dibînin 6 hezar û 267 e. 157 zimanên cihê di îstatîstîkan de qeydkirîne. Parlemena Swêdê bi 24 zimanan weşanê dike."

Tanriku pirs kir ku Erdogan li ser gotina xwe disekine yan na û di îcraetê de van tîne cih yan na û ev tişt anî ziman: "Mînaka Swêdê li holê ye. Kî derewan dike, kî kêmzanîna xwe bi hêrsê vedişêre li holê ye û ne hewceyî gelek mînakan e. Roj bi bêjingê nayê girtin.  Demokratbûn û demokrasî gelemperî ye.  Ger hûn tenê di dema bi kêrî we tên yan dema girtina partiya we de hûn xwe demokrat nîşan bidin wê çaxê yên demokratên rastîn jî dê gotineke wan hebe ku bibêjin."

Di hevdîtina heyeta Amedê û Serokwezîr Erdogan ku 8'ê avrêlê li dar ket de Serokê Baroya Amedê Tanrikulu xwendina bi zimanê kurdî parastibû, hin mînak dabûn û Serokwezîr Erdogan jî bi gotinên "Tu derewan dikî, ne durist î" bi ser Tanrikulu de çûbû. Li ser vê yekê Tanrikulu civîn terk kiribû.