Diyarname

5 sal temam bûn em li Diyarî xebatê dikin, ji Diyarê we agahiyan pêşkêşî we dikin.

Di van pênc salan de bi hezaran nivîs, gotar, hevpeyvîn û gelek cureyên din me pêşkêşî we kir. Di van 5 salan de hûn li ku bûn, hûn li kîjan bajîr an welatî bûn, me kir ku dengê Diyarê we bigihê we.

Di van 5 salan de em nebûn malpera kurdan a ku herî zêde tê şopandin. Jixwe ji serî de jî derdeke me ya wisa tune bû, niha jî. Lê ji serî de jî derdeke me hebû ku em bibin çavkaniya sereke û niha jî derdeke me ya wisa heye. Di vî warî de em bawerin me gavinên serketî avêtine, em gihîştine armanca xwe. Niha malpera kurdan a ku herî zêde nûçeyan bi xwe dişopîne, bi xwe çêdike û pêşkêş dike Diyarname ye. Ya ku weşanên din jî ji bo çavkaniyê dişopînin Diyarname ye.

Di van pênc salan de me gelek nîqaş, li ser gelek babetan dan dest pê kirin û herhal diyar bûye ku di van nîqaşan de serketineke baş derketiye holê.

Ger em bi çavên wisa li meseleyê binêrin em li ser rêya baş in.

Lê ger em bi çavên xwerexneyî li xwe binêrin em dikarin wisa bibêjin: Me hê tiştek nekiriye. Divê em zêdetir tiştan bikin.

Di van pênc salan de ne tenê li ser ziman û wêje, me xwest li ser jiyanê jî tiştinan pêşkêş bikin. Lewma ji bo me jiyan girîng e. Carina tiştên me pêşkêş kirin hin jê aciz bûn, hin jê dilşad bûn.

Bi vî awayî ye karê me. Roj tên û diçin dibin meh, meh salan temam dikin û li dû xwe dihêlin. Bi vî awayî temam bûn 5 salên me.

Di van 5 salan de me pişta xwe neda tu kes, rêxistin û partiyan. Me ji kesî alîkarî negirt, serî li kesî jî neda. Me xwest bi îmkanên xwe, li ser rêya azad a çapemeniyê xebata xwe bikin.

Di van 5 salan de ger kêmasiyên me çêbûbin em lêborînê dixwazin.

Em hêvî dikin di salên xwe yên bê de emê bikaribin zêdetir ji bo xwendevanên xwe xizmetê bikin.

Bi hêviya ku em hemû bi hev re emê karên baştir bikin.