Diyarname
Duh 20 kîlometre nêzî paytexta Yewnanistanê Atînayê şewatê dest pê kiribû û ji ber vê yekê her ku diçû hejmara miriyan zêde dibû. Îro hat ragihandin ku hejmara kesên ji ber şewatê mirine derket 80'yan.
Li herêma Penteli û Rafîna ku girêdayî Atînayê ne duh agir bi daristanê ket, di kurtedemê de şewat gihîşt taxan û di dawiyê de felaketa herî mezin a Yewnanistanê derket holê. Li gor agahiyên îtfaiyeyê 23 jê zarok 164 kes birîndar bûne. Rewşa 11'an giran e.
Serokwezîrê Yewnanistanê Cipras ku ji bo serdanek li Bosna Hersek bû cih da vegeriya Yewnanistanê û sê roj şîn ragihand. Yewnanistanê ji bo temirandina agir ji Yekîtiya Ewropayê alîkarî xwest, li herêmê rewşa awarte hat ragihandin.
Di nav şewatê de gelek zindî jî telef bûn. Her wiha ji aliyê mal û milk ve jî zerareke gelek mezin heye.
Navenda Alîkariya Lezgîn a Neteweyî ya Yewnanistanê (EKAV) ragihand ku hin li mal û li nav erebeyên xwe girtî mane mirine, hin ji ber agir reviyane û xwe avêtine behrê lê têde fetisîne. Ji ber ku hê bûyer tam zelal nebûye, kesên winda hene tune ne diyar e loma ditirsin ku hejmara kesên mirine zêdetir bibe.
Çipras ku sê roj şîn ragihand gotinek balkêş jî anî ziman: "Hem li aliyê rojhilat hem li aliyê rojavayê Attiki di heman demê de şewat derketiye ev yek sedema şikê ye."