Duh li Iraqê û herêma Kurdistanê hilbijartin pêk hat. Vane hin agahiyên li ser hilbijartinê:

Barzanî serkeftina prosesa hilbijartinê pîroz kir

Serokê Herêma Kurdistanê Mesûd Barzanî bi boneya bidawîhatina prosesa hilbijartina parlamentoya Iraqê peyamek pêşkeşî gelên Iraq û Herêma Kurdistanê kir.

Ev jî teksta peyama serok Barzanî ye:

Bi navê Xwedayê mezin û dilovan

Silavên birayetiyê

Ji bo serkeftina prosesa hilbijartina parlamentoya Iraqê, ez pir kêfxweşim ku germtirîn pîrozbahiyê pêşkêşî hemû gelê Iraqê û bi taybetî jî gelê Kurdistanê bikim.

Spasiyên bê‌ dawî ji bo gelê Kurdistanê û hemû birayên delal ên pêşmerge, polîs, asayîş û hemû dezgehên pêwendîdar bi parastina ewlehî û asayîşa li Herêma Kurdistanê ku karîn hewayeke aram ji bo welatiyan dabîn bikin da ku bi azadî û dilniyayî dengên xwe bidin.

Spas ji bo hemû Kurdistaniyên derveyî welat ku tevî astengiyên li ber beşdariya wan ji aliyê hinek‌ ji regezperestan ve, lê wekî ku me dît bi coş û xweşiyeke çûn serî sindoqên dengdanê.

Ez spasiya hemû aliyên siyasi yên ku beşdarî hilbijartinê bûne dikim ku bi hîmeta hemû aliyek rê nedan ku tu bûyereke nexweş rû bide û bi vê yekê jî hilbijartin bi awayeke asayî birêve çû.

Her wiha ez spasiya hemû medyayan dikim û her ji niha ve jî pîrozbahiya li wan hemû xuşk û birayan dikim ku baweriya gel bi dest xistin.

Ji bo me Kurdistaniyan jî dûpat dikim ku divê‌ li hemberî pirsên neteweyî yên me yek helwest bibin û nûnerên gelê Kurdistanê pêkve ji bo bicihanîna destûrê, nemaze maddeya 140’ê kar bikin.

Li ser asta Iraqê jî hêvîdar im ku em hemû xwe li ber çav derbas bikin û bi birayetî alîkariya hevdû bikin û pêkve Iraqeke federal û demokrat pêk bînîn û girêdayî destûrê bîn û li Iraqê yasa serwer bibe û em hemû jî pêkve hewl bidin şerê terorê ji Iraqê dûr bixîn û berjewendiyên bilind ên welat jî ji aliyê hemû aliyek ve li ber çav bigirîn.

***

Rêjeya beşdarîkirina iraqiyan di hilbijartinê de ji %62 ye

Komîsyona Bilind ya Serbixwe ya Hilbijartinan ya Iraqê aşkere kir ku rêjeya beşdarîkirina welatiyan di hilbijartinên parlamentoyê de li seranserê Iraqê ji%62 ye.

Endamê civata Komîsyoan Bilind ya Serbixwe ya Hilbijartinan Hakim Serdar Ebdulkerîn vê êvarê di civîneke çamepeniyê de li Bexdayê li ser rêjeya beşdarîkirina welatiyan di hilbijartinên palamentoya Iraqê de, axivî û diyar kir ku li seranserê Iraqê ji%62 dengderan beşdarî hilbijartinê bûne.

Ebdulkerîm diyar kir li derveyî welat jî 275 hezar iraqiyan dengê xwe dane.

Paşê endama civata komîsyonê Hemdiye Hisênî jî hûrgiliyên beşdarîkirina welatiyan li parêzgehên Iraq û herêma Kurdistanê aşkere kir ku bi vî awayî ye: “

1-Neynewa %66

2-Kerkûk %73

3-Diyale %61

4-Enbar %61

5-Bexda %53

6-Babil %63

7-Kerbela %62

8-Wasit %60

9-Seladehîn %73

10-Necef %61

11-Qadisiye %62

12 Zîqar %60

13-Mîsan %50

14-Besre %57

15-Silêmanî %73

16-Hewlêr %76

17-Dihok %80

18-Musena %61

**　

Hevpeymaniya Kurdistanê li Musilê lîsteya duyê ye

Cîgirê berpirsê melbenda Musilê ya YNK’ê Kebîr Goran ji malpera me re got:” Li gor encamên destpêkê, Lîsteya Hevpeymaniya Kurdistanê li ser asta parêzgeha Musilê, Hevpeymaniya Kurdistanê lîsteya duyê ye pêbînî dikin ji 31 kursiyên Musilê 8-7 kursiyan bi dest biêxe.”

Derbarê namzetên YNK’Ê de jî Goran got:” Tevî ku saxtekarî di hin cihan de hatiye kirin, heta nuha li gor dengdên ku hatine jimartin, namzetên YNK’ê nêzî 15 hezar deng bi dest xistine. Em texmîn dikin li navçeyên Zumar,Şêxan û Mexmûrê namzetên YNK’ê ser kevin. Lê heta nuha dengên taybet û dengên li derve nehatine jimartin.”

Ev agahî ji malpera Pukmedia.com/kurdî hatine girtin