Enqere
Mebûsê DTP'ê Osman Ozçelîk xwest ku di balafiran de bi kurdî jî anon bê kirin lê Midûriyeta Giştî ya Hewakariya Sivîl û THY'ê ev red kir.

Di hevdîtina Butçeya 2010'an a meclisê de Mebûsê DTP'ê yê Sêrtê Osman Ozçelîk pêşniyara "Balafirên ku seferê ji bo bajarên kurdan dikin bila anons xwe bi kurdî bikin" kir. Lê Midûriyeta Giştî ya Hewakariya Sivîl û THY (Rêyên Hewayê yên Tirk ku saziyeke dewletê ye) bersiveke neyînî dan.
THY'ê got ku ew anonsên xwe bi tirkî û îngilîzî dikin, Midûriyeta Giştî ya Hewakariya Sivîl jî wisa bersiv da: " "Di zimanê herêmî de anons ne li gor rêgezên hewakariyê ya sivîl e."
Wezîrê Ragihandinê yê Tirkiyeyê Binali Yildirim jî got ku ev daxwaz ne daxwazeke mafdar e.

Mebûsê DTP'ê Ozçelîk wisa gotibû: "Di balafirên THY'ê de bi tirkî û îngilîzî anonst tê kirin. Di balafirên ku têde biyanî nîn in de jî bi îngilîzî anonst tê kirin. Di balafirên ku diçin herêmê de divê bi kurdî anonst bê kirin. Ew mirovên di balafirê de di dema ku balafir dikeve nav valahiya hewayê, yan jî di dema tişteke lezgîn de nizanin çi bikin."