AGRÎ / MA
Li Bazîdê piştî abîdeya Ehmedê Xanî hilweşandin niha jî tabelaya “Ahmed-i Hani Kultur Parki” rakirin û pelixandin.

Li navçeya Bazîda Agiriyê kayyûmê ku tayînî Şaredariya Bazîdê hatiye kirin abîdeya fîlozofê kurd Ehmedê Xanî hilweşandibû. Piştî hilweşandina abîdeyê niha jî tabelaya li ser “Ahmed-i Hani Kultur Parki” (Parka Çandê ya Ehmedê Xanî) nivîsandibûn rakirin û pelixandin. Hesinên tabeleya parkê xwar kirin û zirar dan parkê.
Kayyûmê ku tayînî Şaredariya Bazîdê hatibû kirin di meha pûşperê de abîdeya Ehmedê Xanî ya ji aliyê Şaredariya DBP’ê ve hatibû çêkirin hilweşandibû. Li ser bertekên li dijî hilweşandina Abîdeya Xanî zêde bûn, her çiqas kayyûmê daxuyanî dabû û gotibû ku dê şaredariya wan abîdeyê çêbike jî lê heta niha abîdeya Ehmedê Xanî nehatiye çêkirin.
Nehat zanîn ku tabeleya parkê ji aliyê kê ve hatiye rakirin. Hat gotin ku di rojên borî de erebeyên şaredariyê li parkê karê lêkirina dîwar pêk anîne.