Îro (13.11.2017) encamên erdheja duh her ku çû zelal bûn. Li Kirmanşanê zêdeyî 370 kesî mirine û bi ser 6 hezar kesî kes birîndar bûne.
Maseya qeyranê ya erdhejê ev agahî weşandin:
- Serpol Zahab: 240
- Dalaho: 14
- Kirmaşan: 14
- Selasî Bewecanî: 15
- Îslamadî Xerb: 22
- Qesrî Şîrîn: 28
- Ciwanro: 30
Rewşa Derbendîxanê
Li bajarokê Derbendîxan ji ber erdhejê 5 welatiyan jiyana xwe ji dest dan. 2 ji van welatiyan Ereb bûn, jinek û kurê wê bûn û xelkê parêzgeha Selahadîn a Iraqê ne û penaberî Derbendîxanê bibûn. Ji ber hilweşîna ew bînaya têde bûn jiyana xwe ji dest dan.
Ew sê kesên din ên jiyana xwe ji dest dane, yek ji ber ketina darê ku bi serê wî ket, jiyana xwe ji dest da. Herdûyên din ji ber tirsê ku krîza dil girtin, jiyana xwe ji dest dan.
Li Merîwanê zirarek mezin heye
Berpirsê Maseya Qeyranê ya Bajarê Merîwanê ragihand ku ji ber erdhejê gelek ziyan gihîştiye welatiyan, malên wan û gundên derdor. Zêdetirî 100 xaniyên Merîwanê û gelek wesayîtên merîwaniyan zerar û ziyan dîtine.
Li Merîwanê nêzî 50 kesî birîndar bûye ku ew şandine nexweşxanaya bajêr.
KNK'ê banga alîkariyê kir
Kongreya Netewiya Kurdistanê (KNK) bi daxuyaniyekê bal kişand ser erdhejê û ji bo mexdûrên erdhejê banga alîkariyê kir.
KNK’ê wisa got: “Li rojhilatê Kurdistanê û bi taybetî bajarê Kirmaşan, Serpîlî Zehaw, Ezgele, Goran, Yarsan, Şabad, Qesra Şirîn, Sêgoşeya Bawecan heya başûrê Kurdistanê taybetî bajarokê Derbendîxan, zerarek mezin a canî û madî gihîştiye welatiyan. Belê mixabin li Rojhilat zerara canî zêde ye ku heya niha 600 kesan jiyana xwe ji dest dane û zêdetirê 6 hezar kes jî birîndar bûne.”
KNK'ê wisa got: "Wekî Kongreya Netewî ya Kurdistanê ji bo malbatên kesên jiyana xwe ji dest dane em sersaxî dixwazin û ji bo birîndaran jî hêviyên demek herî zû de vegerin silametiya xwe ya berê. Ji tevahî gelê Kurdistanê daxwaz dikin bi her şêweyek ku bikarin destê alikariyê ji bo mexdûrên erdhejê dirêj bikin.
Heyva Sor a Kurdistan: Em bi hawara gelê xwe ve biçin
Heyva Sor a Kurdistanê (HSK) ji ber erdheja dijwar a duh êvarê li Rojhilat û Başûrê Kurdistanê rû da kete nava liv û tevgerê û bi taybetî bang li karsaz û Kurdistaniyên li Ewropayê kir ku alîkariyê bi mexdûran re bike.
Ji bo kesên bixwazin alîkarî bikin dikarin ji ser van navnîşanan agahiyan bigirin:
https://www.facebook.com/Heyva.Sor
http://www.heyvasor.org.uk/tr
www.heyvasor.fr
www.stichtingkrhm.nl
http://www.heyvasor.ch
www.rodasolen.se
www.rojasor.at
www.mezzalunarossakurdistan.org
**
Îşev (12.11.2017) li dor saet 21'ê li bajarên wekî Silêmanî, Hewlêr, Duhok û Helebçeyê erdhej çêbû. Li bajarên Rojhilat û li Bakur jî erdhej hat hîskirin.
Erdhej bi meziniya 7.2'yan çêbû. Li gelek gundên bajarên kurdan xanî xira bûne lê niha hin deran jî kes nikare xwe bigihîne wir.
Tê gotin ku 2 kes mirine.
BAŞÛR
Saziya Lêkolînên Jeolojîk a DYA'yê ragihand ku 32 kîlometre li başûrêrojhilatê Helebçeyê bi meziniya 7.2 erdhej çêbûye.
Li Şarezûra Silêmaniyê kesek miriye.
Li Derbendîşaneyê gelek mal xira bûne û tê gotin ku bi dehan kes rakirine nexweşxaneyê.
Li Xaneqîn û li Xurmala jî gelek birîndar hene.
Li navenda Silêmanî hinek zerar heye, camên avahiyan şikiyane.
Li Dihokê jî erdhej xweş hatiye hîskirin lê ji aliyê can û mal ve zirar nîn e.
Li Hewlêr, Dihok, Kerkûk, Şengal û Mexmûrê jî erdhej hat hîskirin lê der barê agahiyên zêdetir hê nehatiye belavkirin.
Şaredarê Derbendîxanê bang li pisporên navneteweyî kir ku bên bendavê raçav bikin û bibin alîkar ka zirarek wê heye yan na. Di vê navberê de gel jî hişyar kir.
BAKUR
Li bajarên Bakur li Amed, Batman, Mêrdîn, Şirnex, Culemêrg, Wan û Mûşê jî erdhej hatiye hîskirin.
ROJHILAT
Ajanseke îranî ragihand ku li Qesrî Şîrîn a Kirmanşahê jî erdhe hatiye hîskirin û di erdhejê de 2 kes mirine, 25 birîndar hene. Erdhej li Sinê û Ûrmiyê jî her wiha li bajarên Îranê Tehran, Tebrîz û Îsfehanê jî hatiye hîskirin.
ROJAVA
Her wiha li Rojava li gelek cihên girêdayî Kantona Cizîrê jî erdhej hat hîskirin.
HIŞYARÎ
Pişpor radigihînin ku wekî şopînerên vê erdhejê erdhejên nû heta bi 7.5 mezinî jî çêbin. Lewra gel hişdar dikin..