Diyarname 

Li gor nûçeya Hawrê Kirêkar a di Rojnewsê de nûnerên YNK, Goran û Yekgirtû xwestine berî referandûmê jiyana gel bê başkirin.

Yekgirtû: Bêyî başkirina rewşa gel dê referandûm xirab bibe

Endamê Rêveberiya Yekgirtûya Îslamiya Kurdistanê Erselan Saleh: “Yek ji ew zilma ku hikumetê li gel kirî, sîstema paşxistina mûçe ye. Em bi rêya wezîrê xwe yê li Desteya Wezîran, rewşê dişopînin û me daxwaz kiriye rewşa jiyana gel asayî bibe ku ji vê rewşa krîzê derbikeve, eger ev pêkhat, wê demê bila referandûm were kirin. Hikumeta Herêma Kurdistanê gihîştiye qonaxekê ku zilmê li gel dike. ji ber wê destkarî li sîstema mûçeyê gel kiriye. Em dikarîn bêjîn, bêyî başkirina rewşa gel wê çarenûsa referandûmê xirab be.”

YNK: Varîla petrolê bû du qat, bila mûçe baş bibe 

Endama Rêveberiya YNK’ê Rêwaz Fayîq: “Ji ber ku dahata sereke ya Herêma Kurdistanê petrol e, sektorên din nikare cihê wê dahatê bigire. Nirxê varêlek petrolê daketibû 25 dolarî. Biryar da ku destkarî li mûçeyê gel bike. Niha nirxê her varêlek petrolê du qat bilind bûye. Eger bi ketina nirxê petrolê re mûçeyê gel kêm kiriye, divê niha were baş kirin.

Me di civîna rêveberiya xwe ya berî niha de Cigirê Serokê Hikumetê Qubad Talebanî vexwend û me projeya YNK’ê pêşkêş kir. Ne tenê ji ber referandûmê, ji ber niha nirxê petrolê du qat jî bûye. Ji ber wan sedeman, divê Hikumeta Herêmê ji ber referandûmê li ser wan mijaran kar bike.”

Goran: Ger Serokê Desteyê xerciya xwe kir nîvî bila ya gel jî bike

Berpirsê Tevgera Goran yê Silêmanî Aso Mehmûd: “Goran ne di hikumetê de ye ku mûçe û debara jiyana gel çareser bike. Hikumet xwe xirab kiriye û divê xwe jî çêbike. Tu rêkariyek yasayî nîn e ku bikare mûçe bike nîvî. Eger Serokê Desteya Wezîran xerciya xwe kir nîvî, bila mûçe jî bike nîvî. Lê evane ji caran zêdetir xerciyan dikin, tenê mûçeyê gel kirine nîvî.

Evane bê yasa mûçe kêm kiriye. Gel her demê dikare evane,  li ser kêm kirina mûçe dadgeh bikin. Ji ber wê ez dibêjim, hikumet wê şaşîtiyê kiriye, divê xwe jî çê bike.”