Diyarname
Wênesazê navdar ê Spanyayî Salvador Dali niha bi meseleya mîrateyê ket rojevê. Jinek bi navê Pilar Abel Martinez serî li dadgehê da û îdîa kir ku ew keça wî ye û dixwaze ji mîrateya wî sûde bigire. Martinez ji bo vê yekê serî li dadgehê da û xwest gora wî bê vekirin û testa DNA bê kirin.
Salvador Dali di sala 1989'an de mir. Dadgeha li Madridê daxwaza Martinez anî cih û biryar da ku gora hunermendê navdar vebe û testa DNA'yê bê kirin. Dadgeh di sala 2015'an de li bajarê Girona ya Katalonyayê jinek vekir. Jina ku doz vekiriye Pilar Abel Martinez di sala 1956'an de li bajarê Dali yê bi navê Figuerez hatiye dinê, ji sala 2007'an ve îdîa dike ku ew keça Dali ye lê derveyî zewaca fermî hatiye dinê. Martinez îdîa dike ku diya wê li mala Dali xizmetkar bû û hevaltiya wê ya ligel Dali piştî demek veguheriye bûye evîn û têkiliya wan çêbûye. Martinez ligel mîrateyê dixwaze paşnavê Dali jî bi dest bixe.
Parêzerê Martinez ê bi navê Enrique Blanquez dibêje ku hê dem nediyar e dê kengê gora Dali bê vekirin lê îhtîmal ew e ku di meha tîrmehê de bê vekirin.
Dali ligel jina xwe Gala 48 salan zewicî mabû û wî ew wekî periya xwe ya îlhamê bi nav kiribû. Di dema zewacê de qet zarokên wan çênebûn. Dali di wesiyetnameya xwe de gotibû ku ew hemû mîrateya xwe diyarî dewleta Spanyayê û Weqfa Gala-Salvador Dalî dike. Lê Dadgeha Bilind gotibû ku tiştên ji berhemên Dali bêne bi dest xistin mafê mîratxurên wî jî têde heye.