Diyarname
Serokwezîra Îngilistanê Theresa May ji bo berî nîqaşên "Brexit"ê bihêztir bibe biryar da ku li welat hilbijartinê çêbike. Wê hêvî dikir ku dê dengên mezintir bigire û serokwezîriya xwe xurtir bike. Ji bo vê yekê 8'ê mehê gel çû cem sindoqan û deng da. Lê di dawiya dengdanê de tiştê ku May dixwest çênebû.
Kursiyên Mihafezekaran kêm bûn
Partiya Mihafezekar ku May seroka wê ye jî di hilbartinê de 318 kursî bi dest xist lê nikarî piraniya Kameraya Avam bi dest bixe. DUP'ê (Partiya Yekîtiya Demokratîk a Bakurê Îrlandayê) 10 mebûs bi dest xistin. May piştî ligel Qralîçe Elîzabetha 2'yemîn hevdîtin çêkir daxuyand ku ew dê ligel DUP'ê şikîratî çêbike. Lê nehat gotin ku ew dê koalîsyonê saz bikin yan dê DUP ji derve piştgirî bide.
Serokê DUP'ê Arlene Foster wisa got: "Di vê serdema zehmet de li welat dikare çawa îstîkrar bê saz kirin, li ser vê emê ligel Mihafezekaran hevdîtinê çêbikin."
Partiya Karkeran kursî zêde kirin
Ev hilbijartin ji bo Partiya Karkeran jî muhîm bû. Ji ber ku Serokê Partiya Karkeran Jeremy Corbyin yekem car diket hilbijartinê, li nava partiyê bi xwe jî yên dijî wî hebûn, piraniyan bawer dikir ku dê Partiya Karkeran dengan winda bike. Berevajî derket. Partiya Karkeran hejmara kursiyên xew ji 232'yan derxist 261'ê.
Niha rewşa May ji berî hilbijartinê zehmetir e; hem hejmara mebûsên xwe kêm kirin, hem dixwest xurtir bibe lê derbe xwar. Bi vê yekê helbet dê hikumet saz bike, lê li aliyek jî Serokê Partiya Karkeran Jeremy xwest May îstîfa bike.
Çapemenî çi nivîsî?
Rojnameyên Îngilistanê ji gelek aliyan ve li ser hilbijartinê sekinî. Vane hin gotinên ji wan:
Financial Times:
Rojnameyê gotina "Li gor anketên ji sindoqan derketin May di qumara ku lîst de bi ser neket." Edîtorê beşa polîtîka yê rojnameyê George Parker jî nivîsî ku piştî vê yekê nediyar e dê May wekî serokwezîr bimîne yan na.
The Times:
Rojnameyê wisa got: "Qumara mezin a May têk çû, tiştek eyb e ku piraniya kursiyan bi dest nexistiye."
Guardian:
Rojnameyê diyar kir ku May bi anketê ji sindoqan derket şoq bûye û ji bo Serokê Partiya Karkeran jî wisa got: "Corbyn li çar aliyên welat 100 mîtîng çêkir û heyecar xist nava alîgirên xwe. Rojnameyê got ku Partiya Karkeran li kuçeyan xwebirêxistin çêkir û kampanyayek xurt da dest pê kirin.