Diyarname

Hejmara kesên ji Tirkiyeyê direvin û li Almanyayê serî li mafê penaberiyê didin rojane zêdetir dibe. Di nava serîlêderên penaberiyê de kurd û tirkên bi piranî bi alîgiriya Fethulleh Gulen têne tewanbarkirin hene.

Li gor agahiyên Daîreya Fedaral a Karê Koçber û Penaberan (BAMF) ji destpêka sala 2017'an heta dawiya meha avrêlê bi giştî 2130 kesên ji Tirkiyeyê li Almanyayê serî li mafê penaberiyê dan. Ji van kesan 1338 kurd in. Bi vî awayî hejmara penaberên ji Tirkiyê keta rêza 8'emîn a welatiyên ku herî zêde li Almanyayê serî li mafê penaberiyê didin. BAMF'ê da zanîn ku ew nikarin mîsogeriya ka daneyên nasnameyî rast in bidin, ji ber wan kesên bi dev gotine ku kurd in wekî kurd tomar kirine.

Di heman daxuyaniyê de hat destnîşankirin ku ji dema hewldana derbeya par li Tirkiyeyê ve 209 kesên xwedî pasaportên dîplomatîk û 205 kesên xwediyên pasaportên memûriyê (pasaportên kesk) jî serî li mafê penaberiyê dane.

Gelek leşkerên li navenda NATO ya li Brukselê jî di nava kesên ku xwediyên pasaportên dîplomatîk in û li Almanyayê serî li mafê penabertiyê dane hene. Di  rojên derbasbûyî de jî diyar bûbû ku Almanyayê rasterast piştî encama referandûma 16'ê avrêlê ya li Tirkiyeyê mafê penaberiyê daye gelek leşkerên ku li Almanyayê serî li penaberiyê dabûn. Pejirandina serîlêdanên penaberiyê yên leşkerên tirk ji aliyê şîrovekerên siyasî ve wekî destpêka krîzeke nû ya di navbera Almanya û Tirkiyeyê de rû bide hatibû destnîşankirin.