Diyarname

Hozan Dilgeş ji sala 1975'an ve bi awayekî profesyonel kar û xebata muzîka kurdî dike. Bi taybetî di salên 90'î de dengê wî li nav gund, navçe û bajarên kurdên Bakur de digeriya. 

Hozan Dilgeş di sala 1952´yan de ji malbateke Êzîdî li gundê Fisqînê yê Nisêbînê ji dayik bûye.

Di sala 1978'an de bi navê "Ma qey bindestî para meye lo" kasetek wî tê tomar kirin. Paşê bi navê "Dayê hêsîrê, tu pir jar û mestî, te por sipî kir, hêjî bindestî“ (1979) kasetek din tomar dike û wê salê diçe Ewropayê li Almanyayê bi cih dibe.

Paşê ev kasetên wî derdikevin: "De lêxin, lêxin birano lêxin, xayînê mezin axa û şêxin" (1980), "Newroza, Newroza cejna gelê me" (1981),  "Karkero Piroletero" (1983), "Serî dan û Sir nedan" (1986), "Muxtaro" (1989), "Biçukê canê" (1990)

Di van salên 90'î de ku deng û awazê wî bajar bi bajar digere ew bi xweşiya şekir dikeve û dest bi dermankirinê dike. Di vê dermankirinê de bi mehan li nexweşxaneyê dimîne û ji muzîkê dûr dibe. Di destpêka 2000'î de baş dibe û careke din vedigere nav muzîkê, kaseta "Ez û yar" derdixe.

Çend roj berê hunermendên TEV-DEM'ê li nexweşxaneyê çûn serdena wî û diyar kirin ku ji ber belavbûna şekir lingên wî jêkirine. Ev xeberek ne xweş bû, xeberek tehl bû lê tiştek bê kirin nîn e. Niha hêviya me ew e ku Hozan Dilgeş ji vê nexweşiya bela, nexweşiya şekir xilas bibe, zêdetir neêşe.

Em ji vir silavên xwe ji bo wî dişînin, strana wî ya "Bûçûkê Canê" wekî Klîba Hefteyê hildibijêrin û pêşkêşî we dikin.

Fermo Hozan Dilgeş "Biçûkê Canê":