Agirî

Navenda Çandê ya Semayê ji bo xwendina pirtûkan di nav civakê de zêdetir bibe û balê bikişîne ser vê, dest bi kampanyaya "Qumbareya Pirtûkan” kir. 

Navenda Çandê ya Semayê di bin banê Şaredariya Agiriyê de xebatê dike. Saziyê ji bo balê bikişîne ser xwendina pirtûkan û rêjeya xwendina pirtûkan zêde bike bi navê “Qumbareya Pirtûkan” kampanyayek da destpêkirin. Ji bo vê 3 qumbere li navenda Agiriyê, Zanîngeha Îbrahîm Çeçen û Kolana Tahîr Elçî hatin danîn, pirtûkên di hundirê van qumbareyan de, wê ji dibistanên gundên berê hatine diyarkirin re bêne şandin. Rêvebera Navenda Çandê ya Semayê Avşîn Aslan diyar kir ku di demên pêş de ew dê hejmara qumbareyan zêde bikin û got: “Armanca me li hemû kuçe, kolan û gundan bicihkirina qumbareyan e."

Aslan diyar kir ku wê qumbere dem dem bên valakirin û wiha axivî: “Dema di hundirê qumbereyan de 150 pirtûk bi cih bibin, wê bên valakirin. Bi vî awayî pirtûkên em bi dest bixin, em ê bişînin gundên berê me ew diyar kirine.”

Aslan bal kişand ser girîngiya xwendinê û wiha domand: “Her ku rêjeya pirtûkan zêde bibe, wê ferdên bîrbir bigihên. Civakeke ji çand û hunerê dûrketî tê afirandin. Di van rojan de, pêdivî bêtir bi kesên xwedî li çanda xwe derdikevin heye. Ez bawerim wê mirov bi hestiyarî nêzî kampanyaya me bibin. Her pirtûka bexşî kampanyayê bê kirin, li cem me qîmeteke wê heye.” 

‘Wê pirtûkek bibe 100 pirtûk’ 

Aslan bal kişand her pirtûka ku wê têkeve qumbareyê û wiha got: “Li cihekî xwendina pirtûkan zêde bibe, rêjeya bîrbiriyê jî zêde dibe. Mirovên pirtûkan dixwînin, refleksên wan ê ji bo hawirdorê jî hestiyartir in. Her pirtûkek têkeve qumbereyê wê bibe 100 pirtûk û li destan bigere. Bi vî awayî em ê xwe bigihînin bi sedan mirovî.” 

Ji DÎHABER hatiye girtin