Navenda Nûçeyan
Meclisa Iraqê biryar kir ku Artêşa Çekdar a Tirkiyeyê leşkerên xwe ji Iraqê vekişîne. Meclisê ji hikumetê xwest vê hêzê wekî hêzek dagirker bi nav bike.

Parlamentoya Iraqê îro bi serokatiya Serokê Parlamentoya Iraqê Selîm Cibûrî civiya. Di mijara îro ya parlamentoya Iraqê de xala herî serekî jî hebûna leşkerên Tirk a li Iraq û biryara Parlamentoya Tirkiyê ya dirêjkirina tezkereya ji bo Iraqê hebû.

Parlamentoya Iraqê ji bo vekişandina leşkerên Tirk li ser 7 xalan biryar da û ew biryar jî wiha ne.

“-Pêwîste hikumeta Iraqê Balyozê Tirk ê li Bexda vexwîne û nerazîbûna li hemberî demdirêjkirina tezkereya ji bo hebûna leşkerên Tirk nîşan bide.

-Pêwîste hikumeta Iraqê hemû tedbîrên xwe yên dîplomasî û leşkerî ji bo parastina Iraqê pêk bîne. Her wiha carek din pêwendiyên aborî û bazirganiyê diber çavan re derbas bike.

-Divê hikumeta Iraqê ji Neteweyên Yekbûyî (NY), Encumeniya Asayîşa Navneteweyî û Yekîtiya Ereban daxwaz bike ku bertek nîşa hebûna leşkerên Tirk li ser xaka Iraqê bide û wan derxin.

-Pêwîste hikumeta Iraqê hêzên Tirk ên li ser xaka Iraqê wekî hêzek dagirker bibîne û ji bo derxistina wan xebata pêwîst bike.

-Divê Iraq hemû danûstandinên xwe yên li gel Tirkiyeyê cardin berçavan re derbas bike.

-Pêwîste hikumeta Iraqê ji aliyên pêwendîdar daxwaz bike ku der barê kesên mayîna leşkerên Tirk li ser xaka Iraqê destek dikin û daxuyaniyên ji bo piştgiriya wan didin, dozê li ser wan veke.

-Parlamentoya Iraqê daxuyaniya Erdogan ên der barê serweriya Iraqê de red dike û van wekî daxuyaniyên parçebûna pêkhateyên Iraqê dibîne.”

Ji Rojnewsê hatiye girtin