HENÎFE HISÊN

Em nikarin tenê bibêjin Bab û derbas bibin. Ev herêm li bakurê Sûriyê hem ji hêla jeopolîtîk ve, hem jî ji hêla tevna xwe ya civakî ve xwedî cihekî girîng e. Bab bi çend kîlometreyan nêzî Helebê ye, her wiha li ser devê rêya wê korîdorê ye ku di navbera Efrîn û Kobanê de vedibe. Dîsa ji bo Reqa jî pir girîng e. 

Ji bo vê, hemû hêzên ku li ser Heleb û Reqa hesabên wan hene, girtina vê deverê ji bo wan pir girîng e. Ji bo vê di serî de dewleta dagirker a Tirk û hêzên din vê herêmê wekî devereke ku mehdê wan veke dibînin, û hesabên pir qirêj li ser kirine. Wekî tê zanîn di vê dema dawî de trafîkeke hevdîtinê li Tirkiyeyê û di navbera hêzên herêmê û ên cîhanî de çêbû, di navbera Tirkiye, Sûriye û Îranê de. Dîsa di navbera Amerîka û Tirkiyeyê de, di navbera Rusya û Tirkiyê de jî çûnûhatin çêbû. 

Ev hevdîtin hemû jî ji bo lihevkirina li ser van herêman û pêşîlêgirtina pergala federasyona demokratîk a bakurê Sûriyeyê hatin kirin. Heya radeyekê van hêzan li hev kirine, lê tiştên ne di hesabên wan de jî derketine holê. Hemû jî bi hev re di nava şerekî lihevkirî de ne. Ya balkêş ew e ku hemû jî bê agahiya hev bi me re dikevin têkiliyê û dixwazin hêzên me ji bo xwe bi kar bînin. Ji ber ku baş dizanin ku bê hêzên me nikarin tu plana xwe bi ser bixînin. Lê hemûyan jî li ser tiştekî li hev kiriye. Wê 20 km ji axa Sûriyê bidin dewleta dagirker a Tirkiyê yanî ji Sînorê Tirkiyê ji Cereblûs heta Raî bidin Tirkiyeyê. Dewleta dagirker a Tirk jî ew grûbên çete yên wekî Eniya Fetih el-Şam, Tabûrên Sultan Murat, DAIŞ û Eniya el-Nûsra ku xwe guhartine, kirine qalikekî din, tîne li wê xetê bi cih dike û bi hêzên me re dide şerkirin. 

Ji ber ku armanca wan ew e ku bi wê xetê tenê bi sînor nemînin, bên Babê bigirin û paşê jî berê xwe bidin Helebê. Bêguman, ev ne di hesabê van hêzên cîhanî de bû. Dîsa hemûyan qebûl kiriye ku rexmî Tirkiyeyê, korîdorekê heya Efrînê bidin hêzên me, da ku me razî bikin. Ji milekî ve koalîsyon vê yekê dixwaze û ji milê din ve Îran û Rusya vê yekê dixwazin. Ji ber ku koalîsyon dizane ku ger em çembera li ser Efrînê neşikînin em ê nikaribin beşdarî operasyona Reqayê bibin. Rus jî ji bo em bikevin navbera wan û Tirkiyeyê û ew jî li ser hemdê xwe werin Babê û Helebê bikin garantiyê. 

Hemû jî behsa hebûna hêza me dikin û dibêjin bêyî we nabe. Heya niha tu hêz nabêjin ka hûn ew qas fedekarî dikin, em ê doza Sûriyê ya demokrasiyê çawa çareser bikin û doza kurd û hemû pêkhateyên din çawa mîsoger bikin. Ev ji bo wan ne pir derd e. 

Dewleta Tirk a dagirker jî ji vê yekê sûdê werdigire û hemû grûbên çete li derdora xwe kom dike û şûrê xwe kişandiye li her kesî gefan dixwe. Niha behsa operasyona mertalên Firatê tê kirin. Haya koalîsyonê û Rusya pir baş ji vê heye, li hesabê wan jî tê. Her roj Tirk dibêjin me Cereblus girt em ê werin Minbicê û Girê Spî jî. Vê, wekî şantaj bi kar tînin. Ka ew ê bikin nekin pir ne diyar e, lê hêzên koalîsyonê ji wan bêhtir bi hewes in. Dibêjin binêrin, Tirk wê werin Minbicê û Girê Spî jî bigrin, ji bo xatirê we em bi Tirkiyeyê re nîqaş dikin da ku wan bisekinînin. Çima vê dikin, gelo heyranê çavên me ne? Bêguman na, bi vê peyamekê didin. Yanî binêrin ger wekî ez dixwazim hûn nekin, Tirk wê êrîşî we bikin, Tirk li me guhdarî nakin. 

Em jî vê dibêjin kurdan û dostên wan ji van çîrokan êdî têr xwarine, li pêşiya me tenê şensek heye ew jî berxwedan e. Mîna Kobanî û hemû cihên din çawa me bi berxwedanê bi ser xist, em ê li wir jî bi berxwedanê bi ser bixînin. Ji vê yekê hêzên herêmî û cîhanî bi me re bin jî û ne bi me re bin jî em ê vê yekê bikin. Ji bo vê, bila gelê me hemû vê yekê baş zanibe, em bi xwe nekin kes ji me re nake. Hemû serferber bibin û li gorî rastiya gelê şerker bijîn.

jindasilan@gmail.com

19.09.2016, Yenî Ozgur Polîtîka