STENBOL

Hevgerînendeya Weşanê ya Giştî Ozgur Gundemê ya berê Eren Keskîn bi daxwaza girtinê sewqî dadgehê hate kirin. Keskin di îfadeya xwe de got: "Gelek nivîskar û rêveberên vê rojnameyê bi kuştinên kiryar nediyar hatibûn qetilkirin. Mînak hinek ji wan Musa Anter, Ferhat Tepe û Huseyîn Denîz in. Ez ji bo ku piştgiriyê bidim vê rojnameyê ya rast jî ji bo kiryar bên dîtin ez bû hevgerînendeya giştî."

Keskîn di çarçoveya lêpîrsîna "endamdiya rêxistinê" "yekîtiya dewletê xira kiriye" de ji bo îfade bide hat Edliyeya Stenbolê. Her wiha parêzerên Komeleya Hiqûqnasên Azadîxwez (OHD) û Komeleya Hiqûqnasên Hemdem (ÇHD) jî ji bo piştgiriyê bidin Keskîn hatin Edliyeyê. Keskîn îfade da dozgerê çapemeniyê Umut Tepe. Piranî parêzerên jin parastina Keskîn kirin. 

Keskîn di îfadeya xwe de got ku ji bo ku kiryarên Musa Anter, Ferhat Tepe û Huseyîn Denîz bên dîtin bûye gerînendeya weşanê ya giştî. 

Îfadeya Keskîn wiha ye: "Heta 27'ê adara 2016'an bi hevalê xwe Huseyên Aykol re Hevgerînendetiya Weşanê ya Giştî min kir. Piştî vê dîrokî di rojnameyê de peywireke min tune bû. 15 rojan carek ji bo rojnameyê nivîsan dinivisînim. Gerînendetiya weşanê bi temamî sembolîk e. Gelek rêveber û nivîskarên rojnameyê di kuştinên kiryar nediyar de hatibûn qetilkirin. Mînak hinek ji wan Mûsa Anter, Ferhat Tepe û Huseyîn Denîz in. Ez ji bo piştgiriyê ya rast jî ji bo kiryarên van kuştinan bên dîtin bûn gerînendeya weşanê. Têkîldarî kuştinên kiryar nediyar bi Serokomar Recep Tayyîp Erdogan ê ku wê demê Serokwezîr bû re li Qesra Dolmabahçeyê bi Dayikên Şemiyê û ÎHD'ê re me civînek li dar xist. Ez jî wekî rêvebera Komeleya Mafên Mirovan tevlî vî civînê bûm. Erdogan soza wekî 'careke din di dema me de dê kuştinên kiryar nediyar nebin em ê hemû kiryaran bibînin' da. Ev civîn di 2014'an de bû lê roj tam nayê bîra min. Bandor an jî peywira min a wekî polîtîkaya weşanê ya rojnameyê diyar bikim tune ye. Bi awayeke aktîf ez pîşeya xwe parêzeriyê dikim. Ji ber vê yekê jî ne pêkan e ku di rojnameyê de demeke zêde bisekinim. Ez di rojnameyê de bêhtir li ser mafên mirovan û şîdeta li hemberî jinan nivîsan dinivîsînim. Agahiya min tune ye ku rêveberên KCK/PKK'ê yên li çiya bi mahlasan nivîsan dinivîsînin. Ez parêzvana mafên mirovan im. Heta niha qet nebûme endama tu rêxistinê. Tu caran der barê min de bi sûcdakirina 'endamtiya rêxistina terorê' lêpirsîn nehatiye destpêkirin. Ez rêveberê rojnameyê jî nîn im. Ez sûcdakirinên ku der barê min de tên gotin qebûl nakim."
Dozger ji bo tewqîfkirin Keskîn şandin cem Dadger, dadger piştî îfadeyê ew serbest berda.

(Foto arşîv: Di sala 2014'an de Xelata Aştiyê ya Orhan Dogan dabûn Eren Keskîn)