Dihok

Li Taxa Malta ya Dihokê nûçegihanê Rojnewsê Vedat Hisên Elî îro serê sibehê dema ku dixwaze biçe ser kar ji aliyê hinek kesên nenas ve tê revandin û di saet 12:30'an de cenazeyê wî li ser rêya sereke ya di navbera Dihok û qezaya Sêmêlê de qetilkirî hate dîtin. Heya niha derbarê bûyerê de tu agahiyên zelal bi dest neketine. Lê cihê guleyan lê nîn e, bi îşkenceyek zêde hatiye qetilkirin.

 Rojnameger Vedat Hisên Elî li ajansa RojNews nû dest bi kar kirî bû.

Rojnews: Ev bûyer di bin berpirsiyariya PDK'ê de ye

Rojnewsê li ser qetilkirina Wedat Hisên Elî nûçeyek weşand û got ku bi caran ew ji aliyê Hêzên Parastin ên PDK’ê ve hatibû girtin û jê hatibû xwestin ku sixûriyê bike. Lê belê wî teklîfên bi vî awayî qebûl nekiribû, ji ber vê sedemê gelek caran rastî gefan hatibû.

Di nûçeyê de wisa hat gotin: "Divê hêzên PDK'ê demek ji ya din zûtir vê bûyerê ronî bikin, ji ber ku ev bûyer di bin berpirsyariya wan de ye. Di van demên dawî de bûyerên bi vî rengî bi taybet êrîşa li ser rojnameger û rêxistinên civaka sivîl zêde bûne. Ev yek cihê guman û fikara ne.

Em bang li hemû raya giştî û saziyên civaka sivîl û mafê mirovan dikin ku der barê mijarê de xwedî helwest bin.

Di demên pêş de agahiyên derbarê qetilkirina nûçegihanê me Wedat Hisên Elî gihîşte ber desetê me, em ê der barê bûyerê de ji raya giştî re agahiyên berfirehtir parve bikin."

**

Nûçeya eleqedar:

- Kuştina rojnameger Elî hat şermezar kirin