Diyarname

Di maçên îro de Îrlandaya Bakur û Ukrayna di Stada Lyon a ku 59 hezar temaşevan lê bûn li dar ket. Car caran baranek gur bariya, di deqîqeya 57'an de ji ber xişikê maç kurtedemek sekinî, lê di dawiyê de bi saxî û selamî maç temam bû. Îrlandaya Bakur bi 2-0 reqîbê xwe Ukrayna têk bir. Îralndaya Bakur yekem car beşdarî tûrnûvayek bi vî rengî bûbû û yekem car serketinek bi dest xist di vê tûrnûvayê de.

Nîveka yekemîn bi 0-0 bi dawî bû. Di nîveka duyemîn deqîqeya 49'an de McAuley li ser navê tîma xwe golek avêt: 1-0. Demek dirêj rewş wisa dom kir. Di 90 deqîqeyî de dengek din derneket û piştî 90'î 90+6 hat lîstin. Tam di dema ku maç bi dawî dibû vê carê McGinn derket ser dikê û gotina dawî got: 2-0. Îrlandaya Bakur bi vê 3 pûanên xwe girtin, Ukrayna jî piştî têkçûna li hemberî Almanyayê careke din têk çû û bê pûan ma. 

Îngilstan bi 2-1 bi ser ket

Her du tîmên Kraliyeta Yekbûyî Îngilistan û Galler hatin hemberî hev. Ji serê maçê ve Îngilistan xwedî êrîşan bû lê aliyê ku gol bi dest xist Galler bû. Di deqîqeya 42'yan de Gareth Bale ji dûr ve, di dema lêdana serbest de bi şid li gogê da, qeleparêzê Îngilistanê dest lê da lê nekarî pêşî li gogê bigire: 1-0. Nîveka yekemîn bi vê serketina Gallerê bi dawî bû.

Di nîveka duyemîn de Îngilistanê bi Jamie Vardy di deqîqeya 56'an de bersiv da. Bi vê golê re Îngilistanê hê zêdetir giranî da ser keleha Gallerê lê heta 90 deqîqeyê jî nekarî tiştek bike. Di deqîqeya 90+1 de Sturridgeyê ku di gola din pas dabû, vê carê gol avêt û Îngilistan bi 2-1 derxist pêş. Bi vê encamê Îngilistan bû xwedî 4 pûanan û ji bo derketina ji komê avantajek mezin bi dest xist.

Galler di 3 pûanan de ma.

Polonya pûanek ji Almanyayê girt

Di maça dawî ya rojê de Almanya û Polonya hatin hemberî hev. Almanya ku wekî favoriya komê û yek ji favoriya ji bo fînala kûpayê tê binavkirin li hemberî Polonyayê pûanek winda kir. Polonya derfet neda golavêjên Almanyayê û maç bi 0-0 bi dawî bû. Bi vê encamê Almanya û Polonya gihîştin 4 pûan, Îrlandaya Bakur bû xwedî 3 pûanan. Ukrayna ku piştî du maçan qet pûan negirt, mafê derketina ji komê derê ji dest xist.