AMED (DÎHA)

Parlamentera HDP'ê ya Amedê Sîbel Yîgîtalp qeydên deng ên welatiyên li Sûrê asê mane da guhdarkirin. Ji welatiyên ku di bin dorpêçê de ye Senîha Surer bi van gotinan rewşa dawî ya li Sûrê vegot: "Li vir hemû mal û avahî hilweşiyane, cihekî ku em lê bimînin nemaye, em di jêrzemînekî de ne. Li vir pitik, zarok hene, wellehî birîndar hene. Em bi potên zarokan xwîna wan didin sekinandin" 

Li navçeya Sûrê ya Amedê, zarok, jin, birîndar jî di nav de bi sedan kes ji ber êrîşên giran ên hêzên dewletê bi komkujiyê re rû bi rû ne. Parlamentera HDP'ê ya Amedê Sîbel Yîgîtalp, qeydên deng ên telefonê yên bi welatiyên Sûrê re hatine kirin bi civîna çapemeniyê re bi raya giştî re parve kir. Kurê Senîha Sûrer a ku li Sûrê asê maye, Mehmet Beşîr Surêr, hevserê wê Nezîr Surer û keça wê Vasfiye Turan jî tevlî civînê bûn.

Diyalogên ku rewşa dawî ya Sûrê radixe ber çavan bi vî rengî ye:

Sîbel Yîgîtalp: Dayika Senîha ji me re behsa rewşa xwe bike.

Senîha Surer: Tu dengê dibihîsî? (Ji bo dengê çekan ê ji pişt ve tê) 

Sîbel Yîgîtalp: Ez dengê te dibihîsim dayika Senîha. Ji min re rewşê vebêje.

Senîha Surer: Niha 15 jin hene, birîndar hene, piraniya jinan birîndar in. Jin ji mêran pirtir in.

Sîbel Yîgîtalp: Temam temam, bi lez û bez bêje bila pirsgirêk çênebe, rewşa we çi ye?

Ev hevdîtina yekem, ji ber ku topbaran dom dike di nîvî de qût dibe.

Di hevdîtina duyemîn de kesekî ku navê wî nayê zanîn telefonê vedike û navê zarokên birîndar dide Yîgîtalp.

Sîbel Yîgîtalp: Ezê pirsa zarokan bikim, tu dikarî navên wan ji min re bêjî?

Kesê ku li Sûrê maye: Li ba me niha 7 zarok hene. Deqeyek, ez navên wan bidim we?

Sîbel Yîgîtalp: Bide, bide.

Kesê li Sûrê maye: Elîf Su 4 mehî ye, Ozgur Aslan 3 salî, Muaz Aslan 4 salî, Rojda Aslan 7 salî, Gulîstan Aslan 11 salî, Berîtan Tosun 2 salî, Şerîf Tosun 10 salî ye. Ev zarokên li vê derê ne lê li cihên cûda jî zarok hene lê ez paşnavên wan nizanim.

Sîbel Yîgîtalp: Navên wan bêje.

Kesê li Sûrê maye: Yek ji wan Velî 9-10 salî ye, Ruken 4-5 salî ye, Berfîn jî 4-5 salî ye. Lê ew ji me dûr in, li taxek pişt de ne. Agahiya me ji wan tune ye.

Sîbel Yîgîtalp: Çend kes hene li wir? 

Kesê li Sûrê maye: Li vir derdora 30-35 kes hene.

Sîbel Yîgîtalp: Çend jin, çend mêr in?

Kesê li Sûrê maye: Piranî jin in.

Sîbel Yîgîtalp: Emê serî li DMME'yê bidin, em agahiyan bigirin, ji bo em lezê bidin pêvajoyê dipirsim.

Hevdîtina sêyemîn wisa ye:

Senîha Surer: Tiştê anîn serê me li tu cihê çênebûye.

Sîbel Yîgîtalp: Belê. 

Senîha Surer: Li vir hemû mal, avahî hilweşiyane, cihekî ku em lê bimînin nemaye, em di jêrzemînê de ne. Li vir zarok hene, pitik hene, wellehî birîndar hene. Em xwîna wan zarokan bi potîkên zarokan didin rawestandin. 30-35 kes hene, li cihên din jî hene, yên di bin kavilan de mane jî hene.

Sîbel Yîgîtalp: Belê.

Senîha Surer: Yanî em hevûdu nabînin, em nikarin serê xwe rakin. Di rojê de kêmanî 20 guleyên hewanê tên. Haya kesî ji tu kesî tune ye. Em perîşan in. Hun çima tiştek nakin. Hun çima serî li cihekî nadin.?