Diyarname
Festîvala Fîlman a Navneteweyî ya Stenbolê her sal Xelata Rûmetê dide kesên keda wan ketiye nava sînemayê û îsal jî xelat girt diyar kirin: Suzan Avci, Ulku Erakalin, Şeref Gur, Perran Kutman, Jeyan Ayral Tozum. Kesên hatiye diyarkirin 6’ê avrêlê di merasima vekirina festîvalê de dê xelatên xwe bigirin.

Festîvala Fîlman a Navneteweyî ya Stenbolê ku ji aliyê ÎKSV’ê (Weqfa Çand Hunerê ya Stenbolê) ve tê lidarxistin îsal 35’emîn car dê deriyên xwe veke. Festîvalê wekî gava pêşî ji bo îsal hin navên keda wan ketiye nava sînemayê diyar kirin û bi Xelata Rûmetê wan rûmetdar bike.

Ji van lîstikvan Suzan Avci di nêzî 400 fîlman de rol girtiye. Wê bi taybetî bi rola jina xirab ya herî zêde jê tê hezkirin navdar daye.

Ulku Erkalain ku bi asîstaniya derhêner Lutfî O.Akad dest bi derhêneriya kiriye di sala 1961’ê de yekem fîlmê xwe “Unutamadigim Kadin” (Jina ez ji bîr nakim) kişand. Dûre “Beklenen Şarki”, “Yildizlarin Altinda”, “Çiglik Çiglika Bir Sevda” jî di nav de nêzî 200 fîlm kişandiye.

Fîlmsaz Şeref Gur di Erman Fîlm de dest bi karê sazkariya fîlman kir ku alîkar, heval û dostê xwediyê Erman Fîlmê Hurrem Erman bû. Piştî 30 salên xebatê bi alîkariya Erman rabû Şeref Fîlm ava kir (1978). Di vê kompanî de ji Atif Yilmaz heta Lutfi Akad piştgirî da gelek derhêneran. “Vurun Kahpeye”, “Vesikalik Yarim” ku li Tirkiyeyê bûne klasîk hin fîlmên ku wî sazkariya wan kirine ne.

Perran Kutman bi lîstikvaniya xwe li Tirkiyeyê xwedî cihek taybet e. Di nav fîlmên klasîk ên tirkan de lîstiye, di gelek lîstik û parodiyan de ligel Mujdat Gezen lîstiye û li nav sînemahezên tirk wekî “Perihan Abla” (Xwişka Perîhan) navdar bûye.

Û Jeyan Ayral Tozum ku wê jî nêzî 60 salan ked daye sînema, televîzyon û şanoyê niha tê xelatkirin. Festîvalê ev nav wekî kesên îsal dê bi Xelata Rûmetê bêne rûmetkirin diyar kirin û xwedî li keda wan derket.