Mukît Arslan

Di destpêka Festîvala Fîlman a ya Navneteweyî ya Stenbolê de fîlmê bi navê WELCOM wekî filmê destpêkê hat nîşandan.
Fîlm bi serencama penaberan ve dest pê dike, penaberên kurd dertên pêş. Bi navê Bîlal xortekî kurd evîndarê keçeke kurd e. Navê keçikê Mîna ye. Mîna bi malbata xwe koçê Îngilistanê  dike. Bîlal kurdê Iraqê ye. Bi tirekî heta sînorên Fransayê tê. Di qontrola polîsan de tê girtin û wî derdixin dadgehê. Lê tevgera dewleta Fransayê û rewşa zagonên wan penaberan wekî mirovan nahesibîne. Bilez û bezekî derdixin dadgehê û bi aweyekî bê dad wan dişînin qampa penaberan. Li qampê sazgehên mafê mirovan xwarinê didin wî û penaberan. Di nav gemarê de dijîn. Şûştin û paqijî tune. Li bajêr mirov ji wan aciz dibin. Kêm kes alîkariya wan dikin. Lê ew jî ji ber zagonên dewletê û tevgera ewlekaran newêr in.
Bîlal ji bo evîna xwe dixwaze biçe Îngilistanê. Tevî çend hevalên xwe bi tirekî dixwazin ku derbas bibin. Lê mixabin tên girtin. Bîlal xwe bi xwe biryarê dide ku bi soberiyê derbas bibe here Îngilistanê. Ji bo wî jî dest bi fêrbûna soberiyan dike. Ji mamosteyê soberiyê, ji Sîmon bi heq dersê dixwaze. Sîmon serî de bê dil qebûl dike.
Sîmon dev ji jina xwe berdaye lê doza wan dom dike. Di wê navberê de bi biryara dadgehê ew û jina xwe hev ber didin. Jina Sîmon di sazgeheke mafên mirovan de xebatê dike û di marketekî de dema dan û stendinê de rastî Sîmon tê, dema ku ji marketê dertên çend penaberên kurd ji dixwazin ku ji marketê dan û stendinê bikin lê ewlekariya marketê wan nake hindur. Jina Sîmon hêrs dibe û bi wê hêrsê Sîmon jî rexne dike.
Sîmon paşê li ser rexneyên jina xwe difikire û du penaberên kurd Bîlal û Selîm dibe mala xwe, xwarinê dide wan û wan dike mêvan. Bi Bîlal re diaxife û sedema pêwendiya wî û soberiyan dipirse. Bîlal dibêje, ezê bi soberiyê derbasî Îngilistanê bibim, ji bo evîna xwe. Hestên Sîmon tevlihev dibin û bandorek lê çêdibe. Biryara xwe dide û alîkariya Bîlal dike. Ji bo vî jî polîsên Fransayê li wî dozê vedikin. Di encamê de Bîlal bi soberiyê dikeve Behra Manşê lê nêzî sînorên Îngilistanê, çarsed mêtro maye ku xwe bigîhîne erdê reş ewlekarên behrê wî dibînin. Noqî binê avê dibe û dimire.
Fîlm bi awayekî xemgîn xilas dibe.
Di fîlmê de axaftinên kurdan tev bi kurdî ne. Mijar jî li ser wan e. Piraniya fîlm bi kurdî ye. Zimanê kurdî bi awayekî rast hatiye bikaranîn.
Ji hêla hunerî ve fîlmeke baş e. Min eciband. Lê tiştê ji bo min ne xweş bû. Li tu derê dinyayê kes kurdan naxwaze û wan wekî serêşiyekî dibîne. Tiştê ku di fîlm de xweşî min neçû. Diziya penaberekî kurd bû. Dema li mala Sîmon dibe mêvan xelata Sîmon a zêrîn didize. Ev jî ji bîr nekirine.
Di encamê de ev mijar dertê pêş "Ew penaberên ku hûn ji wan aciz, ew kurdên ku hûn jê hez nakin bi hezaran kîlometre rê bi peyatî, ji behran bi soberiyê, derbas dibin û ji bo evîna xwe bê xem dimirin."
Ez lîstikvan Selîm Akgul, Derya Ayverdî û Firat Ayverdî ji bo lîstika wan pîroz dikim. Her bijîn.
Xweş bû lo...

Kunyeya fîlm:
WELCOME
Derhêner: Philippe Lioret
Lîstikvan: Vincent Lindon, Firat Ayverdi, Derya Ayverdi, Selim Akgul
Sala çêkirinê û welat: 2009, Fransa
Mawe: 116 deqîqe
Ziman: Fransizî, Kurdî, Farisî

Rojên li Festîvalê tê nîşandayîn:
4 avrêl, Şemî, Sînemaya Emek, saet 13.30
5 avrêl, yekşem, Sînemaya Nîşantaşî City Life, saet 19,00
7 avrêl, sêşem, Sînemaya emek, saet 16,00

mukitarslan@hotmail.com

***

Nivîsên Mukît Arslan ên ku berê di Diyarnameyê de hatine weşandin:

- Guhên Kerê
- HECÎ BELED

***

Nûçeyên din ên li ser 28'emîn Festîvala Fîlman a Navneteweyî ya Stenbolê:

- Festîvala Fîlman a Stenbolê dest pê kir 

- Bilêtên fîlman li benda we ne

- Bernameya Festîvala Fîlman a Stenbolê eşkere bû