Diyarname
Lîstika ku ji "Zimanê Çiyê" ya Harolp Pinter û "Mirina Egîdekî" a Mehmed Uzun hatiye girtin û bi navê "Mirina zimanekî" hate lîstin, yekem car li Zanîngeha Bîlgiyê derket pêşberî temaşevanan.

Di galaya lîstika duh êvarê li Zanîgeha Bîlgiyê lidar ket de gelek kesên navdar jî made bûn.
Xwediyê Xelata Nobelê Harold Pinter li ser kurdan lîstikeke bi navê "Zimanê Çiyê" nivîsandibû. Her wiha helbesta Mehmed Uzun a bi navê "Mirina Egîdekî" ku navdar e di vê lîstikê de gihîştin hev. Derhêneriya lîstikê Aydin Orak kiriye û di lîstikê de Bilal Bulut, Şengul Ozdemir, Perihan Adalmiş û Aydin Orak lîstine. Ronahiya lîstikê Ahmet Çay, kinc Sezgin Aydin, asîstaniya derhênerî Sait Kulen û makyaja plastîk jî aîdî Soner Caner e. Her wiha muzîka lîstikê jî aîdê Ciwan Haco ne.

Di gala lîstika ku ji aliyê Teatra Avesta ve hate lîstin de jina Mehmed Uzun Zozan Uzun ji bo sipaskirinê derket ser dikê. Uzun got ku dema Aydin Orak li Swêdê listika "Rojnivîska Dînekî" lîst wê gelek ji lîstikê hez kiribû û dixwest rojekê ev lîstik jî bê lîstin. Uzun wiha berdewam kir: "Min dixwest îro Mehmed Uzun jî li vir ba û li vê lîstikê temaşe bikira. A rast niha ez dilgeşî û xemgînî bi hev re dijîm."

"Mirina Zimanekî" di bin derhêneriya Aydin Orak de di bin banê Teatra Avesta de hate lîstin. Teatra Avesta ji aliyê Aydin Orak û Cihan Şan ve di sala 2003'yan de hate avakirin. Wan piştî lîstika "Tu ne Îsheq î, ne Cemîl" ku bi tirki hate lîstin, sê lîstikên bi kurdî lîstin: "Rojnivîska Dînekî" (Listika Gogol), "Tu ne Gara yî" (Lîstika Aziz Nesin" û "Araf" ku li ser jiyana Musa Anter hatiye amade kirin.