STENBOL
Bi hezaran kes hatin ber avahiya rojnameya Cumhuriyetê û girtina Gêrînendeyê Weşanê Giştî rojnameyê Can Dundar û Nûnerê Enqereyê Erdem Gul şermezar kir. Hevseroka Giştî ya HDP'ê Fîgen Yuksekdag ku ew jî beşdarî çalakî bû got "Emê destûr nedin ku çapemenî were bêdengkirin. Emê li hemberî dîktaya AKP û Qesrê bi hev re li ber xwe bidin"
Dundar û Gul duh êvarê hatibûn girtin. Îro bi hezaran kes çû ber avahiya rojnameyê. Hevseroka Giştî ya HDP'ê Fîgen Yuksekdag, parlamenterên HDP û CHP'ê jî li wir bûn.
Girse diruşme "Hûn nikarin çapemeniya azad bêdeng bikin" bilind kirin.
Hevseroka Giştî ya HDP'ê Fîgen Yuksekdag jî li ber avahiyê axivî û diyar kir ku ji ber biryara girtinê bi hêrs in lê ne bêzar in û got "Li Tirkiyeyê hemû çapemeniya muxalîf di bin tehdîdê de ye."
Yuksekdag got ku ewê serê xwe li ber rejîma otorîter netewînin û li hemberî zext û zordariyê bi hev re têbikoşin. Yuksekdag wiha wisa got: "Em ji nûnerên çapemeniya azad Dundar û Gul re, silavên gelên Tirkiyeyê yên li ber xwe didin dişînin. Emê li hemberî dîktaya AKP û Qesrê bi hev re li ber xwe bidin."
Li ser navê Rojnameya Cumhuriyetê jî daxuyanî hate dayîn. Di daxuyaniyê de hate gotin ku dê rojnameya Cumhuriyetê rojnamegerî û nûçegîhaniya xwe berdewam bike û ji rêya xwe venegere.
**
Nûçeya eleqedar:
- Can Dundar û Erdem Gul hatin tewqîfkirin