Feratê DENGIZÎ

Êdî naxwazim ne tiştekî bibêjim û ne jî binivîsim.

Hestên min ziwa bûn, hêstirên çavên min  jî…

Ne sebr û metaneta ku bawerî wek nesîhetan di guhên min de dike pistepist û ne jî gotinên girs ên qaşo mirovahî û hebûnên berz dikin.

Li ser xaka min ne bawerî min têr dike û ne jî mafê mirovan… Tew mafên hebûna xwezayî.

Her tişt ji bonî ku min tunebike di êrîşê de ne bi kenên fenekî yên mîna rovî.

Ka hûn çi ji me dixwazin!

Naxwazim gazinan bikim û loman jî.

Lê ev çi ye!

Ma lîstoka zarokan e?

Ka hûn çi ji me dixwazin..!

Ev der xaka min e û xwediyê jiyanê me ku ev mafê min e.

Ka hûn çi ji min dixwazin?

Ka mirovahî bi pêşde çûbû!

Bedenên mirî dikin wesle wesle û dikişkişînin, dişewitînin û hêrsa dilê wan vala nabe, mîna cinawirên tev xezeb an jî hûtên heftserî yên neyarê hebûnê.

Ka çi bi we hatiye hûn naserifînin ku kurd jî xwedî mafê hebûn û vînê ne!

Hûn doza çi li cangorî û goristanê cangoriyê me dikin…

Hê… Komeleya Mafê Mirovan a Cîhanê ma hûn beqa dixesînin an jî hûn di guhên gê de ne!

Namûs, ar û rûmeta kurdan, rûmeta mirovahiyê te binpêkirin. Bajar, gund, xweza tê talankirin û wêrankirin. Agir dibare li welatê min, agir dibare/agirê ku we vêxistiye bi ser xaka min de..

Çand û mirata mirovahiyê tê tunekirin.

Ma şermê hûn xistine çi hali?

Siyasetmedar, rêveber, şaredar nehiştin li Kurdistanê, çima ku kurd êdî ji heqî xwe dertên dinyayê li ser serê me tarî dikin.

Ka deng û sewta we…

Mirin êdî bi sedan li qadên paytext in, ma wijdanê we kor e?

Deng bide mirovahî, qaşo cîhana demokrat û wekehev!

Herê, berjewendiyê we kiriye xiltê kor, serê xwe ji qûmê ji bin axê derxin, hela yê jor selikan çê dike…

Kurd û Kurdistan wêran dibe. Wêran dibe mîrata mirovahiyê. Divê pêşiya vê hêrsa heywanî bê girtin…

Loma em berxwedêr in, berxwedêrên Şingal û Kobanê…

Baş bizanibin, ev der Kurdistan e, warê serhildan, vejîn û berxwedanê…

Naxwazim bibim hemdemê we, hê mirovahiya ker, kor û lal…

Ma Gever, Cizîr, Silîva û Amed… tiştekî bi we nade fêhmkirin.

Em liyaqî azadiyê ne.

Em ê bi ser kevin.

Naxwazim guhdarê qaşo fîlozoftiya we ya qaşo rohnayiyê jî bim…

10.10.2015