Necîbe Qeredaxî

Berî 24 salan bi sirûd û dirûşma bi nav û deng “Demî Raperîn e” bi watayeke din dema serhildanê ye gel rabû û hemû saziyên dewlet di 3 hefteyan de ji holê rakirin û başûrê Kurdistanê bi serhildaneke girseyî û çekdarî di heman demê de ji saziyên Baasî hat paqijkirin. Ew sirûd hîn jî dema mirov li wan guhdarî dike rojên xweş yên vê serhildanê tînin bîra mirovan û cihêkî girîng di bîra me ya dîrokî de girtine, ji ber ku Serhildanê li hemberî zilm û zora rejîma Baas ku bi kîmyabaran, Enfal, kuştin, girtin, dardekirin û hemû cureyên neheqiyê bûn.

Lê piştî 24 salan heman dîmen me di roja 03.10.2015 dît, gel sirûda “demî Raperîn e” got, gel serî radike û îşareta xurt ya serhildaneke din heye, lê vê carê li hemberî kî û ji bo çi? 

Ez ê li vir hinekî sedeman li gorî ne yên baweriya wan bi şoreşê heye lê yên ku hîn jî baweriya wan bi reforman heye nîşan bidin, wê demê bila xwîner biryarê bidin bi rastî jî “Demî Raperîn e” an na? 

40 hezar kes ji Başûr koçber bûn

Di nava 3 mehan de zêdetirî 40 hezar kesî ji başûrê Kurdistanê koçber bûn, di nava 2 hefteyên dawî de zêdetirî 10 cenazeyên van koçberan vegerandin başûrê Kurdistanê? Di bereyeke şer de ji ber nebûna kordîneyeke hevpar di nava hêzên pêşmergeyên aliyên siyasî yên başûrê Kurdistanê de di teqînekê bi destê DAIŞ'ê de 31 pêşmerge şehîd bûn, lê tenê 3 ji wan ji bo gel ragihandin ji tirsa serhildanê, rayedar ditirsin ragihînin, lê piştre jî dîmen hatin weşandin. Ev 3 meh in ku li ser hev tu meaşê  pêşmerge, karmend û mamosteyan nayê dayîn tevî ku meaş tekane çavkaniya debara wan e. Rewşa Tendrustî û Perwerdê li başûrê Kurdistanê di asta herî trajedîk de ye. 

Raporên li ser hatinên Petrolê jî tên weşandin rastiyên nelirêtî di bazirganiya bi petrola Herêma Kurdistanê de radixin ber çavan û baştir bersiva pirsa gelo dema serhildanê hatiye an na, didin. 

Wezîr cuda, Barzanî cuda diaxive! 

Hikumet dibêjê pere nîn e, lê serokê komisyona darayî li Perlemana Herêma Kurdistanê Îzzet Sabîr dibêjê, “3 mîlyar dolarên hikumetê hene, ev pere ji firotina petrolê tên û razandî ne li banka Kurdistanê ya navdewletî ku Nêçîrvan Barzanî xwediyî wê ye”. 

Çend caran wezîrê petrolê hatiye vexwendinî Parlemanê ji bo lêpirsînê, lê ji ber ku bi biryareke neqanûnî N. Barzanî gotiye “bê îmzeya wî Parlemen nikare lêpirsîna tu wezîrêkî/ê bike", ser hemû nelirêtiyên tê girtin.

170 bîrên petrolê kar dikin, pere kuda diçin? 

Petrol ji 170 bîrên cuda tê derxistin û ji derve re tê şandin, hem li ser rêya lûleyan û hem bi tankêran. Lê pere nakevin xezîneya hikumetê, her du partiyên desthilatdar YNK/PDK van pereyan dibin, ji bo wê jî kiriza aborî û nedayîna meaş wekî kirîzeke siyasî xwe dide der. 

Tevî ku ji 19'ê gelawêjê ve dema serokayetiya herêmê ya Mesûd Barzanî bi dawî bûye jî, heya niha aliyên siyasî tu çareseriyek ji bo vê pirsgirêkê nedîtine. 

Van rojên dawî jî greva kar a mamoste, karmend û hemû beşên cuda yên civakê dest pê kiriye û her diçe belav dibe. Dema nivîsandina vê gotarê li zêdetirî 15 deverên cuda greva mamosta, karmendên tendrûstiyê destpê kiriye. Tevî hemû zehmetiyan û tevî van kirîzan hemûyan jî heya niha Pêşmerge heman helwêst nîşan nedaye, eger hûn bipirsin çima? Ez ê bibêjim, ji ber ku wan rihê têkoşîn û şerê Gerîlla û Şervanên azadiyê girtiye; pêşmerge jî li kêleka Gerîlla çeperên berxwedanê li hemberê DAIŞ´ê bernade, di nava gel de ev rih divê ji  bo guhartinan bibe bingeh.

necibeqeredaxi@gmail.com

Yeni Ozgur Polîtîka

Têbiniya Diyarnameyê: Sernavê vê gotirê “Demî Raperîn e” bû, me guhart û wisa weşand.