Enqere
Mebûsê DTP'ê Şerafettin Halis li meclisê xwest akademiya pêşxistina zimanê kurdî bê vekirin.
Îro li meclisê li ser butçeya Wezîrê Çand û Tûrîzmê nîqaş hatin. Di dema axaftina li ser butçeyê de mebûsê Dêrsimê yê DTP'ê Şerafettin Halis axivÎ. Halis da zanîn ku ger TRT bi awayekî zanistî nêzî ziman û çanda kurdî bibe dê xebata TRT Kurdî bibe biwate û ev daxwaz anî ziman: "Bila akademiya pêşxistina çand û zimanê kurdî bê vekirin. Di zagonê de nasname u zimanê kurdî nîn e û tu zagoneke zimanê kurdî bigire bin ewlehiyê nîn e. Ger êdî li vî welatî zimanê kurdî tê qebûlkirin ku nehata qebûlkirin dê televîzyona dewletê pê weşan nekira, wê çaxê bila Akademiya Pêşxistina Ziman û Çanda Kurdî bê vekirin. Ev akademî bila stranên gelêrî, çîrok û lorikên kurdî bi awayekî bipergal berhev bike."
Mebûs Halis her wisa xwest ku bendavên ku dê Newala Mûnzûrê û Heskîfê noqav bikin jî bêne betalkirin.