Feleknas uca

Di sala 1999’an de bi temena xwe ya 22 salî, ji bo Parlamena Ewropayê (PE) ez hatim hilbijartin. Ez li dinyayê, yekemîn parlementer a ku bi nasnameya xwe ya kurd ji bo parlamenekê hatibû hilbijartin bûm.

5 sal piştre, hilbijêrên min carêke din baweriya xwe dan xuyakirin û ez cara duyemîn wekî endama Parlemana Ewropayê hatim hilbijartin. Li Parlamena Ewropayê bi 6 hevalên xwe yên Partiya Çep (DIE LINKE) di nav Koma Yekgirtî ya Çepên Ewropayê/Keskên Çep a Bakur  (GUE/NGL) de cih digirim.

Min di dama duyem de, wekî endam û koordînatorê GUE/NGL di Komîsyona Peşveçûnê de cih girt û di heman demê de ez endama Civata Parlamenên Hevbeş a YE-Tirkiyeyê bûm. Heta îro jî, ez xebata xwe wekî endama cîgir di Komîsyona Jinan û Komîsyona Mafên Mirovan de dimeşînîm. Derveyî vê jî ez ji nû ve wek Seroka Cigîr ji bo koma li hember nijadperestî û dijminiya beyaniyan hatim hilbijartin.

Di xebata xwe ya Komîsyona Pêşveçûnê de min hewl da ku ji aliyê YE'yê ve tedbîr li dijî xizaniya li welatên li paşmayî werin stendin.

Wekî tê zanîn di welatên paşdamayî de wekhewî ji bo jinan nîn e. Di van civakan de jin û zarok di bin zextên civakê de dipelişin. Bi taybetî jî, di heremên şer de, jin û zarok mexdûrên êrîşên çerdarî ne. Min di nav danûstandinên xwe yên bi endamên parlamenê û di nav komîsyonan de hewl da ku polîtîkayêke dadmenî were darxistin, da ku li welatên paşdemayî xizanî û cudakarî kem bibe.

Yek ji xebatên min ên bingehîn jî ji bo mafê mirovan e. Wekî tê zanîn di kewçêra 2005’an de muzakereyên endamtiya Tirkiyeyê yên bi YE'yê re dest pê kirin. Her çiqas Tirkiyeyê di warê hiqûqî de çend gavên girîng avetibûn jî, li Tirkiyeyê zordarî û zext li dijî kemnetew, gel û baweriyên din her diçe zêde dibe. Raman li Tirkiyeyê ne azad e û di salên dawî de hejmarêk zede nivîskar û humermend ji bo ramanên xwe tên cezakirin. Ez bi danûstandin û xebatên xwe hewl didim ku YE û Parlamena Ewropayê hewldanên xwe darberê çareseriya pirsgirêka kurd de û ji bo avakirina demokrasiyê li Tirkiyeyê sist negire.

Ji bo vê yekê jî ez her dem li gel kesên muxalîf bûm. Min di nav komên çavdêr a hilbijartinên Tirkiyeyê de cih girt û herî dawî beşdarî xebata konferansa bîranîna 70'emîn salvegera komkujiya Dersimê bûm.

Hilbijartinên Parlamena Ewropayê di 7’ê pûşpera 2009’an tên lidarxistin. Ez û hevalên min yên çep (DIE LINKE), ger em careke din bên hilbijartin, emê xebata xwe li hember lîberalîzma nû, li dijî mîlîtarîzmê û li hember hewldanên dij demokratîk bidomînin.

Di hemû demên nûneriya perlamenê de, min tu cudatî nekiriye nav beşên civakî û rexistinên siyasî yên çar parçeyên Kurdistanê. Min her dem ji hilbijêrên xwe hêz girtiye. Piştgiriya kurd û biyaniyên din li Ewropayê bûye yek ji sedemên bingehîn, ji bo serkeftina proje û kampanyên ku min û hevalên xwe yên parlamenê bi rê ve birine.

Ez bi vê nivîsa xwe endamediya xwe ji bo Parlamena Ewropayê eşkere dikim. Û hêvî dikim ku ronakbîr, nivîskar, humermendên kurd û saziyên hemû parçeyên Kurdistanê ji bo hilbijartina min piştgiriya xwe amade bikin. Ez dizanim ku ev hilbijartin li Ewropayê tê lidarxistin. Lê polîtika dinyayê navneteweyî ye û piştgirî jî dê navneteweyî be.

Ji Welat hatiye girtin