Diyarname

Hevgirtina Rewşenbîrên Rojavayê Kurdistanê (HRRK) daxuyaniyek weşand û di warê hilbijartinê de piştgiriya xwe ji bo HDP'ê eşkere kir.

Hevgirtina Rewşenbîrên Rojavayê Kurdistanê- HRRK-Bakur li ser hilbijartinê daxuyaniyeke nivîskî weşand û got: "Tirkiye bi giştî û bakurê Kurdistanê bi taybetî  jî di rojên dîrokî re derbas dibe . Gelên ku li vî welatî dijîn bi rêya dengdayîna di hilbijartinên 7’ê hezîranê de bi biryardarî xwe amade dikin ji bo jiyana azad, wekhevî, xweser û bi rûmet ji bo li dijî zilm û zordariyê dengê xwe bilind bikin."

Di daxuyaniyê de hatiye gotin ku ev hilbijartin wekî hilbijartinên herî dîrokî û herî girîng tê nirxandin ji ber pêvajoya nazik ku Tirkiye û bakurê Kurdistanê tê re derbas dibe, bi taybetî jî pêvajoya aştiyê û hewldanên ji bo çareseriya pirsgirêka kurd li vî welatî. Daxuyanî wisa didome:  "Giringiya wê ji ber vê yekê jî tê ku em di demekê de derbas dibin li hemû Rojhilata Navîn hêzên tarî yên di bin kirasê ola îslamê de karê çetetî û zordariyê dikin xwe li ser gelê herêmê ferz dikin û gefan li jiyana pirçandî û pirengiya gelê herêmê dike. Hilbijartinên 7’ê hezîranê dê bibe deriyekî nû ji bo xêzkirina asoyeke nû ji bo gelên herêmê bi hemû cudahî û rengîniya xwe ji bo jiyana wekhev û bi rûmet. An jî dê bibe şikandineke kûr û derî li ber êş û azarên nû û li ber pêvajoyeke tarî veke."

HRRK'ê gotiye ku HDP bi pirengiya xwe rihê nûjenî û dîroka hevbeş a gelên herêmê û pêşeroja wan a hevbeş temsîl dike û ev yek lê zêde kirine: "Em wekî Hevgirtina Rewşenbîrên Rojavayê Kurdistanê em piştgiriya partiya HDP’ê dikin û bang li hemû hêzên aştîxwaz dikin ku hişyar bin û haya wan ji komployên ku bi destê hin hêzên tarî tên hûnandin hebe. Serkeftin wê para bijareka biratiya gelan û jiyana hevbeş be, serkeftin dê ya azadîxwaz û aştîxwazan be û ronahiya xwe bide hemû Rojhilata Navîn. Her wiha em hêzên tarî yên ku dixwazin hemû herêmê vegerînin tarîtiya serdemên berê şermezar dikin û bi dil can piştgiriya xwe ji bo biratiya gelan, aştî û jiyaneke bi rûmet dikin."